სოფლის მეურნეობის მინისტრი ზაზა გოროზია შიდა ქართლის რეგიონში, სოფელ მუხრანში, ნიადაგიდან ქვების ამკრეფ-გამასუფთავებელი თანამედროვე ტექნიკის მუშაობის პროცესს ადგილზე გაეცნო. ახალი მანქანა ნიადაგს ქვებისა და სარეველებისგან წმენდს, რაც ხელს უწყობს სასოფლო-სამეურნეო სამუშაოების სრულფასოვნად ჩატარებას. ეს, მიღებული მოსავლის გაორმაგების ან, უფრო მნიშვნელოვნად გაზრდის საშუალებას იძლევა.
საქართველოს სასოფლო-სამეურნეო მიწების 30%-ზე მეტი ქვიანია, რაც ართულებს მის დამუშავებას და ტექნიკური პროცესების შესრულებას. ასეთ ნიადაგზე მოსავლიანობაც დაბალია.
„სოფლის მეურნეობის სამინისტრომ საცდელად ნიადაგის ქვებისგან გამწმენდი რამდენიმე აგრეგატი შემოიყვანა. ტექნიკამ გაამართლა და მიღებული ხარისხიანი შედეგის გათვალისწინებით, ჩვენ ამავე დანადგარს უკვე საქართველოს ყველა რეგიონისთის შევიძენთ. ეს ახალი ტექნიკა ჩვენს ფერმერებს მიწის ხარისხიანად დამუშავების საშუალებას და შესაბამისად, გაზრდილი მოსავლისა და შემოსავლის მიღების შესაძლებლობას მისცემს", - განუცხადა ზაზა გოროზიამ ჟურნალისტებს.
მიწის ქვებისგან ხელით გასუფთავება დიდ დროსა და ფინასურ დანახარჯებთან იყო დაკავშირებული, თუმცა შედეგი ხარისხიანობით მაინც არ გამოირჩეოდა. ქვებისგან გამწმენდი ახალი აგრეგატის საშუალებით, შესაძლებელი გახდა 1 დღეში 2-3 ჰექტარი მიწის 7-10 სანტიმეტრ სიღრმემდე ხარისხიანი გასუფთავება.
