2012 წლის 20 აპრილს, „დემოკრატიული მოძრაობის" სათაო ოფისში, ახალგაზრდული ფრთის ინიციატივით გაიმართა შეხვედრა სპორტსმენთან, მსოფლიოს ორგზისა და ევროპის ხუთგზის ჩემპიონთან, ოლიმპიური თამაშების არაერთგზის პრიზიორთან თავისუფალ ჭიდაობაში, „დემოკრატიული მოძრაობის" მთავარი საბჭოსა და „სახალხო კრების" აღმასრულებელი საბჭოს წევრ ლუკა კურტანიძესთან.
შეხვედრამ გულახდილ, თავისუფალ ატმოსფეროში ჩაიარა. ბატონმა ლუკამ ისაუბრა მის განვლილ ცხოვრებაზე, სპორტში მიღწეულ წარმატებებზე. მან გაიხსენა მისი პირველი დღეები, როდესაც იგი აქტიურ სპორტში ჩაერთო-მნიშვნელოვანი ნაწილი დაუთმო სპორტული მოღვაწეობის სოხუმის პერიოდს, თბილად ისაუბრა მის პირველ მწვრთნელზე შოთა კიკაბიძეზე. განსაკუთრებული სიყვარულით გაიხსენა საქართველოს ნაკრების წევრები.
ბატონმა ლუკამ ისაუბრა ქვეყანაში არსებულ რთულ მდგომარეობაზე, მათ შორის სპორტის სფეროში არსებულ პრობლემებზე. მან ახალგაზრდების წინაშე პირობა დადო, რომ თუკი მას საშუალება მიეცემა 2013 წლის მსოფლიო ჩემპიონატზე გამოვიდეს საქართველოს სახელით, იგი ქვეყანას მოუტანს გამარჯვებასა და ოქროს მედალს: „მე ერთი რამ მინდა ვთქვა, მე სპორტულ ფორმას იმიტომ ვინარჩუნებ, რომ როგორც კი შეიცვლება ეს ხელისუფლება და პოლიტიზირებული არ იქნება სპორტი, დამერწმუნეთ როგორც პროფესიონალი მე აუცილებლად ვიტყვი ჩემ სიტყვას, მოვიპოვებ მსოფლიოჩემპიონობას და ეს გამარჯვება მიეძღვნება ქართველთა ერთობას!"
დემოკრატიული მოძრაობის ახალგაზრდული ფრთა კვლავ აგრძელებს შეხვედრებს ადამიანებთან, რომლებმაც თავისი ცხოვრებითა და მოღვაწეობით თავი შეაყვარეს საკუთარ ხალხს.
