თინათინ ხიდაშელი კონგრესმენ დევიდ პრაისს შეხვდა. "ქართული ოცნების" პრესამსახურის ინფორმაციით, შეხვედრის დროს საუბარი შეეხო ყველა იმ მექანიზმს, რომლის გამოყენებაც შესაძლებელია ხელისუფლებაზე ზეწოლისთვის, სამართლიანი და კონკურენტული არჩევნების ჩატარების უზრუნველსაყოფად.
"კონგრესმენი დევიდ პრაისი განსაკუთრებით დაინტერესდა არჩევნებამდე ჩასატარებელი ღონისძიებებით, რომელიც პრიორიტეტული მნიშვნელობისაა და აგრეთვე გამოდგება ხელისუფლების მოქმედებების შეფასებისთვის. შეხვედრაზე თინათინ ხიდაშელმა ყურადღება გაამახვილა პოლიციის პოლიტიკური პროცესებისაგან ჩამოშორების აუცილებლობასა და ნაციონალური ტელემედიის ხელმისაწვდომობასთან დაკავშირებულ პრობლემებზე", - ნათქვამია "ქართული ოცნების" მიერ გავრცელებულ პრესრელიზში და აღნიშნულია, რომ კონგრესმენი დაინტერესებულია საქართველოს მხარდასაჭერად და ქვეყნაში თავისუფალი არჩევნების უზრუნველსაყოფად კონკრეტული ნაბიჯები გადადგას.
კონგრესმენი დევიდ პრაისი დემოკრატიის მხარდაჭერის კომისიის წევრი და საქართველოს ძველი მეგობარია.
