იუსტიციის სახლის სერვისებით სარგებლობა უკვე გურიის რეგიონშიც არის შესაძლებელი. 13 აპრილს, ოზურგეთში იუსტიციის სახლის გახსნის საზეიმო ცერემონიალი გაიმართა. ღონისძიებაში მონაწილეობდნენ საქართველოს პრეზიდენტი მიხეილ სააკაშვილი და იუსტიციის მინისტრი ზურაბ ადეიშვილი, საქართველოს აღმასრულებელი ხელისუფლების, ადგილობრივი თვითმართველობის წევრები, მედიის წარმომადგენლები, მოწვეული სტუმრები.
ოზურგეთის მცხოვრებლებს მათ ქალაქში იუსტიციის სახლის გახსნა საქართველოს პრეზიდენტმა მიულოცა, მ. სააკაშვილმა რეფორმების კუთხით საქართველოს წარმატებაზე ისაუბრა და ამ რეფორმების ერთ-ერთ საუკეთესო მაგალითად იუსტიციის სახლები დაასახელა.
ახალი შენობა სრულად აკმაყოფილებს თანამედროვე სტანდარტებს. მისი ავტორები ქართველი ახალგაზრდა არქიტექტორები - კომპანია „არქიტექტორი გამომგონებლების" წარმომადგელები ნიკო ჯაფარიძე, გიორგი საყვარელიძე და დევი ქიტუაშვილი არიან. შენობაში, იუსტიციის სახლის გარდა, ენერგეტიკის სამინისტრო სადაზღვევო კომპანიაც განთავსდება.
იუსტიციის სახლი - იუსტიციის სამინისტროს სერვისების სრულიად ახალი კონცეფციის მქონე საჯარო დაწესებულებაა, სადაც სამოქალაქო რეესტრის სააგენტოს, საჯარო რეესტრის ეროვნული სააგენტოს, ეროვნული არქივის, აღსრულების ეროვნული ბიუროს, ნოტარიუსთა პალატის სერვისები არა მექანიკურად, არამედ - იდეურად და სისტემურად არის გაერთიანული. მყუდრო, სასიამოვნო და კომფორტული გარემო, მაღალკვალიფიციური, კომპეტენტური და კეთილგანწყობილი პერსონალი მომხმარებელთა თავაზიან, სწრაფ და ხარისხიან მომსახურებას უზრუნველყოფს.
საქართველოში პირველი იუსტიციის სახლი 26 მაისს, ბათუმში გაიხსნა და ის თანამედროვე საქართველოს რეფორმებისა და აღმშენებლობის სიმბოლოდ იქცა. დღეიდან მისი გამარტივებული სერვისებით სარგებლობა ბათუმში, რუსთავში, მესტიაში, ქუთაისსა და ოზურგეთშიც არის შესაძლებელი. 2012 წლის ბოლომდე იუსტიციის სახლები გურჯაანში, ახალციხეში, თელავში, თბილისში, გორში, ლაზიკასა და მარნეულშიც გაიხსნება.