ბოლნისის რაიონის სოფელ ტალავერში სოფლის მეურნეობის მინისტრი ზაზა გოროზია სადემონსტრაციო ნაკვეთში თანამედროვე სარწყავი სისტემის დამონტაჟების პროცესს დაესწრო.
ბოლნისის სადემონსტრაციო ნაკვეთზე, რომლის სრული ფართობი 131 ჰა-ია, წვეთოვანი სარწყავი სისტემა მონტაჟდება. სარწყავი სისტემის შეუფერხებლად და უწყვეტ რეჟიმში წყლით მომარაგებისთვის 17 000 ტ-იანი წყლის რეზერვუარი მოეწყო. ჩატარდა რეზერვუარამდე მისასვლელი სარწყავი არხის გაწმენდითი სამუშაო, რომლით სარგებლობას ადგილობრივი მოსახლეობაც შეძლებს.
"სადემონსტრაციო ნაკვეთის მორწყვა პრობლემას წარმოადგენდა, მაგრამ ამ რეზერვუარის და თანამედროვე სარწყავი სისტემის დახმარებით წყლის მიწოდება უწყვეტ რეჟიმში მოხდება. ნაკვეთზე სხვადასხვა კულტურაა დათესილი და თანამედროვე ტექნოლოგიებით უხვი და ხარისხიანი მოსავლის მიღება იქნება შესაძლებელი. მომავალში ეს გამოცდილება საშუალებას მოგვცემს, დავეხმაროთ გლეხებს ახალი ტექნოლოგიების დანერგვასა და გამოყენებაში", - განაცხადა გოროზიამ.
სადემონსტრაციო ნაკვეთების არსებობის მთავარი მიზანი ხეხილისა და ბოსტნეულის წარმოებისთვის საჭირო თანამედროვე ტექნოლოგიების დანერგვა-გამოყენება, მოსავლიანობის გაზრდა, იმპორტის ჩანაცვლება და ქართული პროდუქციის საექსპორტო პოტენციალის ამაღლებაა. ნაკვეთზე საჭირო ტექნოლოგიებით პროდუქციის სრული საწარმოო ციკლის მართვა მიმდინარეობს.
ბოლნისის სადემონსტრაციო ნაკვეთზე ამჟამად მოჰყავთ პომიდორი (5 ჰა), კარტოფილი (20 ჰა), ლობიო (5 ჰა), ხახვი (20 ჰა).
