ფინანსთა მინისტრი საჯარო ლექციებს კურსს სხვადასხვა უმაღლესი სასწავლებლის სტუდენტებისთვის განაგრძობს. დღეს 2 აპრილს დიმიტრი გვინდაძემ შეხვედრა საქართველოს საპატრიარქოს წმ. ანდრია პირველწოდებულის ქართულ უნივერსიტეტში გამართა. მინისტრმა ჩაატარა საჯარო ლექცია თემაზე: „საქართველოს ეკონომიკური განვითარება: ხედვა, სტრატეგია და პერსპექტივები," რომელსაც ეკონომიკისა და ბიზნესის მართვის, ასევე სხვა ფაკულტეტების 200-ზე მეტი სტუდენტი და პროფესორ-მასწავლებლები დაესწრნენ.
დიმიტრი გვინდაძემ მათ ასევე დეტალური ინფორმაცია მიაწოდა სახელმწიფო ფინანსების მართვის კუთხით მიღწეულ პროგრესზე და მიმდინარე რეფორმებზე, გაამახვილა ყურადღება ქვეყნის მაკროეკონომიკურ დინამიკაზე.
მინისტრმა უნივერსიტეტის წარმომადგენლებს ფინანსთა სამინისტროს აკადემიის საქმიანობაც გააცნო. ერთობლივი საგანმანათლებლო პროექტების განხოციელების მიზნით, აკადემია აქტიურად თანამშრომლობს საქართველოში აკრედიტებულ სხვადასხვა უმაღლეს სასწავლებლებსა და საერთაშორისო ორგანიზაციებთან. სტუდენტებთან შეხვედრის დროს, ფინანსთა მინისტრმა აკადემიის მიერ ორგანიზებულ სასწავლო პროგრამებსა და სტაჟირების კონკურსებში ქართული უნივერსიტეტის სტუდენტების ჩართვის მზადყოფნა გამოთქვა.
ფინანსთა სამინისტროში განმარტავენ, რომ სტუდენტებთან ასეთი სახის დიალოგი საშუალებას იძლევა ახალგაზრდობა უფრო აქტიურად ჩაერთოს ქვეყნის მართვის პროცესში, გაიგოს მთავრობის მიერ განხორციელებული ეკონომიკური პოლიტიკისა და სტრუქტურული რეფორმების შესახებ, თავად მიიღოს მონაწილეობა გადაწყვეტილების მიღების პროცესში. ყოველივე ეს უზრუნველყოფს საჯარო ფინანსების გამჭირვალობას.
ლექციის შემდეგ ფინანასთა მინისტრმა გამართა შეხვედრა უნივერსიტეტში სრულიად საქართველოს კათოლიკოს-პატრიარქის წარმომადგენელთან ქორეპისკოპოს იაკობთან (იაკობიშვილი), რექტორ პროფ. სერგო ვარდოსანიძესთან, აკადემიური საბჭოს წევრებთან.
საპატრიარქოს წმიდა ანდრია პირველწოდებულის სახელობის ქართული უნივერსიტეტი სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსისა და ბიჭვინთისა და ცხუმ-აფხაზეთის მიტროპოლიტი, უწმიდესი და უნეტარესი ილია II-ის ლოცვა-კურთხევით 2008 წელს შეიქმნა. 2010 წლის სექტემბრიდან უნივერსიტეტის კარი უკვე ღია იყო ბაკალავრებისთვის, მაგისტრებისა და დოქტორანტებისთვის სხვადასხვა სპეციალობაზე. დღეს ქართულ უნივერსიტეტში სულ 1000-მდე სტუდენტი სწავლობს.
