ფრაქცია "ერთობა სამართლიანობისთვის" პარლამენტში იუსტიციის მინისტრის მოადგილის მისვლას მოითხოვს. როგორც ფრაქციის თავმჯდომარე დიმიტრი ლორთქიფანიძემ პარლამენტის დღევანდელ პლენარულ სხდომაზე განაცხადა, ბიძინა ივანიშვილისთვის მოქალქეობის აღდგენის საკითხზე გადაწყვეტილების მიღების ვადა 5 აპრილს იწურება და შესაბამისად ამ საკითხზე პასუხი მინისტრის რომელიმე მოადგილემ მაინც უნდა გასცეს.
„29 მარტს, სამთავრობო საათზე, იუსტიციის მინისტრის მიერ გაკეთებული განცხადება მნიშვნელოვანი იქნებოდა. თუ ბატონი ზურაბ ადეიშვილი ვერ მოიცლის და ვერ მოვა, რადგან მივლინებაში მიდის, აუცილებელია, რომ ამ კითხვებზე პასუხი მისი სახელით რომელიმე მოადგილემ გაგვცეს" -აღნიშნა დეპუტატმა.
ლორთქიფანიძეს პარლამენტის თავმჯდომარე დავით ბაქრაძე დაპირდა, რომ ფრაქციას დამატებით აცნობებს მივა თუ არა იუსტიციის მინისტრის რომელიმე მოადგილე სამთავრობო საათზე.
29 მარტს, სამთავრობო საათზე ოპოზიციური ფრაქციის შეკითხვებს შს მინისტრი ვანო მერაბიშვილი უპასუხებს. ოპოზიციური ფრაქციის შეკითხვები მაინისტრთან, პრეზიდენტისა და მისი ოჯახის წევრების საქმიანობას, სოლომონ ქიმერიძის გარდაცვალებას, ჟურნალისტ სოფო ნიკოლეიშვილის დაკავებას და სხვა გახმაურებულ საქმეებს ეხება.
