არასამთავრობო ორგანიზაციების მიერ შემუშავებული "მოქალაქეთა პოლიტიკური გაერთიანებების" შესახებ კანონში ცვლილებების პროექტი, იურიდიულ საკითხთა საპარლამენტო კომიტეტმა პარლამენტში დღეს დაარეგისტრირა.
იურიდიულ საკითხთა საპარლამენტო კომიტეტსა და არასამთავრობო ორგანიზაციებს შორის მიღწეულ შეთანხმებებს დღევანდელ ბიუროს სხდომაზე პარლამენტის თავმჯდომარე დავით ბაქრაძე გამოეხმაურა. მისი თქმით, კანონის თვისობრივი ცვლილება არ მოხდება, მაგრამ მიღწეული შეთანხმებების საფუძველზე, ის კითხვის ნიშნები და შეშფოთება მოიხსნება, რომლებიც კანონისთვის სხვადასხვა ინტერპრეტაციის მინიჭებასთან დაკავშირებით არსებობდა.
კანონპროექტზე მსჯელობა იურიდიულ საკითხთა საპარლამენტო კომიტეტსა და არასამთავრობო ორგანიზაციებს შორის, ერთი თვის განმავლობაში მიმდინარეობდა. მასში არის საკითხები, რომელთაც კომიტეტი არ ეთანხმება და მათზე მსჯელობა, საკომიტეტო მოსმენაზე გაგრძელდება.
იურიდიულ საკითხთა კომიტეტის სხდომა, ხუთშაბათს გაიმართება, პარასკევის პლენარულ სხდომაზე კი "მოქალაქეთა პოლიტიკური გაერთიანებების" შესახებ კანონპროექტი, პირველი მოსმენით გავა.