იურიდიულ საკითხთა კომიტეტის თავმჯდომარე პავლე კუბლაშვილი იმედოვნებს, რომ "მოქალაქეთა პოლიტიკური გაერთიანებების შესახებ" კანონში არასამთავრობო სექტორთან შეთანხმებით შესულ ცვლილებებს ნაკლები აჟიოტაჟი მოჰყვება.
როგორც მან პარლამენტის ბიუროს დღევანდელ სხდომაზე განაცხადა, არასამთავრობო სექტორის წარმომადგენლებმა გარკვეული დრო ითხოვეს, რათა მისი საბოლოო რედაქცია საორგანიზაციო დეპარტამენტს ჩააბარონ.
"ამ ფორმულირების მომზადებაში ჩვენც მივიღებთ მონაწილეობას. რეგლამენტის თანახმად, შემდეგ ბიურომდე 72 საათით ადრე ეს საკანონმდებლო წინადადება უკვე მზად იქნება", - აღნიშნა კუბლაშვილმა.
შეგახსენებთ, რომ პარლამენტში "მოქალაქეთა პოლიტიკური გაერთიანებების შესახებ" კანონში შესატანი ცვლილებები იმ სახით დარეგისტრირდება, რა სახითაც ის კოალიციამ "ეს შენ გეხება" მოამზადა. თუმცა პარლამენტში განხილვების დროს კანონპროექტში გარკვეული სახის ცვლილებები შევა.
ბიუროს მომავალი სხდომა ორშაბათისთვის იგეგმება.
