"ქრისტიან-დემოკრატების" ერთ-ერთი ლიდერი ლევან ვეფხვაძე მიიჩნევს, რომ ბიძინა ივანიშვილისთვის მოქალაქეობის აღდგენასთან დაკავშირებით, საზოგადოების განწყობა პატრიარქის ქადაგებიდან გამომდინარეობს.
როგორც ვეფხვაძემ ჟურნალისტებთან NDI-ის კვლევების კომენტირებისას განაცხადა, ივანიშვილის მოქალაქეობასთან დაკავშირებით, პატრიარქის ქადაგება, საზოგადოებისთვის, ისე როგორც "ქრისტიან-დემოკრატებისთვის", მნიშვნელოვანი აღმოჩნდა.
"ყველა ადამიანს, რომელიც ამ ქვეყანასთან ახდენს იდენტიფიცირებას, მოქალაქეობის შესაძლებლობა უნდა ჰქონდეს", - აღნიშნა ვეფხვაძემ და იმედი გამოთქვა, რომ ივანიშვილისთვის მოქალაქეობის აღდგენის პრობლემა მალე მოგვარდება.
აშშ-ის ეროვნულ-დემოკრატიული ინსტიტუტის (NDI) კვლევის თანახმად, ივანიშვილისთვის საქართველოს მოქალაქეობის აღდგენას გამოკითხულთა 70% ემხრობა. როგორც NDI-ის საქართველოს ოფისის დირექტორმა, ლუის ნავარომ დღეს, კვლევის პრეზენტაციისას განაცხადა, გამოკითხულთა მხოლოდ 8% მიიჩნევს, რომ ივანიშვილს მოქალაქეობა არ უნდა აღუდგეს.