სამშენებლო კომპანია „ცენტრ-პოინტის" მიერ დაზარალებული მენაშენეები პარლამენტის თავმჯდომარის მოადგილის, რუსუდან კერვალიშვილისათვის დეპუტატის უფლებამოსილების შეწყვეტას ითხოვენ. ამის შესახებ დაზარალებულმა პირებმა დღეს პარლამენტში ფრაქცია "ერთობა სამართლიანობისათვის" წევრებთან შეხვედრაზე განაცხადეს.
დაზარალებულ მენაშენეთა ასოციაციის გამგეობის წევრის, ადვოკატ მარინე კორძაძის განაცხადებით, კერვალიშვილი დეპუტატობის პერიოდში, სამეწარმეო საქმიანობაში მონაწილეობას, უკანონოდ იღებდა.
„2010 წელს, როცა რუსუდან კერვალიშვილი პარლამენტის წევრი იყო, სამეწარმეო საქმიანობაში მონაწილეობა მიიღო, რასაც დეპუტატს მოქმედი კანონმდებლობა უკრძალავს. არსებობს დოკუმენტები, რომელიც კერვალიშვილის მიერ სამეწარმეო საქმიანობაში მონაწილეობის მიღებას ადასტურებს. კერძოდ, ის ხელს აწერდა კომპანიის საქმიანობასთან დაკავშირებულ დოკუმენტებს. რაც არის იმის საფუძველი, რომ მას პარლამენტის წევრის უფლებამოსილება შეუჩერდეს", -- აღნიშნა კორძაძემ და დასძინა, რომ სამეწარმეო საქმიანობაში უკანონო მონაწილეობის ფაქტზე გამოძიება უნდა დაიწყოს.
შეგახსენებთ, რომ „ცენტრ-პოინტისა" და მისი მემკვიდრე „დექსუსის" მიერ დაზრალებულმა მენაშენეებმა დეპუტატებს იმ „ფინანსურ მაქინაციებზე" გააცნეს ინფორმაცია, რამაც, მათი მტკიცებით, 30 ათასი ადამიანი ფაქტიურად ღია ცის ქვეშ დატოვა.
