მომავალ კვირას პარლამენტის რიგგარეშე სხდომაზე მინისტრთა ახალ კაბინეტს დაამტკიცებენ.
მინისტრთა კაბინეტის ხელახალი დამტკიცების ვალდებულება პარლამენტს, ჯანდაცვის მინისტრის ანდრია ურუშაძის ზურაბ ჭიაბერაშვილით შეცვლის გამო გაუჩნდა. კერძოდ, მთავრობაში უკვე მე-7 მინისტრი იცვალება და მინისტრთა კაბინეტს კანონის თანახმად, ნდობა პარლამენტმა ხელახლა უნდა გამოუცხადოს.
მინისტრთა კაბინეტისთვის ნდობის გამოცხადების საკითხი პარლამენტში დღეს შევიდა. მომავალი კვირის სამშაბათს, პარლამენტის რიგგარეშე სხდომა გაიმართება, სადაც მინისტრთა გაანახლებული კაბინეტისათვის ნდობის საკითხი დადგება. მანამდე კი, საკითხს საპარლამენტო კომიტეტებში განიხილავენ.
საქართველოს პარლამენტის რეგლამენტის 184-ე მუხლის თანახმად, პარლამენტის მიერ, მთავრობის შემადგენლობისა და სამთავრობო პროგრამისათვის ნდობის გამოცხადების შემდეგ მთავრობის თავდაპირველი შემადგენლობის ერთი მესამედით, მაგრამ არანაკლებ 5 წევრით განახლების შემთხვევაში, საქართველოს პრეზიდენტი 1 კვირის ვადაში წარუდგენს პარლამენტს მთავრობის შემადგენლობას ნდობის მისაღებად, სრული შემადგენლობის უმრავლესობის მხარდაჭერა სჭირდება.
