„გარემოს დაცვის შესახებ" კანონში ცვლილებების კანონპროექტის განხილვისას, გარემოს დაცვისა და ბუნებრივი რესურსების კომიტეტის დღევანდელ სხდომაზე ლორთქიფანიძემ განაცხადა, რომ ბუნებისათვის ზიანის მიყენებისთვის სისხლის სამართლებლივი პასუხისმგებლობისგან გათავისუფლება, კატეგორიულად მიუღებელია.
კერძოდ, კანონპროექტის თანახმად, ნებისმიერი პირს, ვინც გარემოს დაცვისა და ბუნებრივი რესურსებით სარგებლობის სფეროში ენერგეტიკისა და ბუნებრივი რესურსების სამინისტროსთან შეთანხმებას გააფორმებს, შეთანხმებით გათვალისწინებული პერიოდში ჩადენილი/განხორციელებული ყველა ქმედება კანონიერად ჩაეთვლება. ასევე, ლიცენზიანტსა და სახელმწიფოს შორის დადებული საგადასახადო შეთანხმებით, სისხლის სამართლით გათვალისწინებულ პირობის დარღვევის შემთხვევაში (თუ ბუნებას მნიშვნელოვან ზიანს მიაყენებს), ლიცენზიანტს სისხლის სამართლებრივი პასუხისმგებლობისგან გათავისუფლებულების საშუალება ეძლეოდა.
„ვინც არ უნდა იყოს ლიცენზიანტი - უცხოელი თუ ადგილობრივი, ქვეყნის საჯარო ინტერესს უნდა ითვალისწინებდეს. მან თავისი მოქმედებებით იმაზე უფრო დიდი ზიანი არ უნდა მიაყენოს ბუნებას, რაც კანონმდებლობით გათვალისწინებული არ არის. ლიცენზიანტების მიმართ სისხლის სამართლებრივი პასუხისმგებლობის საკითხი უცვლელი უნდა დარჩეს", - აღნიშნა ლორთქიფანიძემ.
კანონპროექტზე მომხსენებელი, ენერგეტიკის და ბუნებრივი რესურსების მინისტრის მოადგილე ნინო ენუქიძე საკითხის დასაზუსტებლად, სხდომიდან რამდენიმე წუთით გავიდა. დარბაზში დაბრუნების შემდეგ მან განაცხადა, რომ შეთანხმება მიღწეულია და სისხლის სამართლის პასუხისმგებლობისგან გათავისუფლების ნაწილი, კანონპროექტიდან ამოღებული იქნება.