საპარლამენტო ფრაქცია „ქრისტიან-დემოკრატების" თავმჯდომარემ გიორგი ახვლედიანმა და ვანის საკრებულოს „ქრისტიან-დემოკრატმა" დეპუტატმა დათო ლორთქიფანიძემ სოფელ კუშუბოურიდან რაიონის ცენტრამდე გზის გასაწმენდად ვანში მძიმე ტექნიკა ჩაიყვანეს.
ქდმ-ს ინფორმაციით, თვეზე მეტია არ გაწმენდილა გზები, დიდთოვლობის გამო ბავშვები ვერ დადიან სკოლაში, მოსახლეობას ამოეწურა სურსათის მარაგი და ჩახერგილია წისქვილამდე მისასვლელი გზაც.
„რამდენჯერმე მოგვმართა მოსახლეობამ დახმარების თხოვნით. ადგილობრივი ხელისუფლების უყურადღებობამ გადაგვაწყვეტინა თავად ჩავრეულიყავით პრობლემის მოგვარებაში, ჩამოვიყვანეთ მძიმე ტექნიკა და ვიმედოვნებთ, რომ გარე სამყაროსგან სოფლის ერთთვიანი იზოლაცია დღესვე დასრულდება" - განაცხადა გიორგი ახვლედიანმა.
