ვანის საკრებულოს დეპუტატი, ,,ქრისტიან-დემოკრატი" დათო ლორთქიფანიძე დიდითოვლობის გამო რაიონში შექმნილი პრობლემების ოპერატიულად მოგვარებას ითხოვს. მისი ინფორმაციით, თვეზე მეტია არ გაწმენდილა ტობანიერის ტერიტორიული ორგანოს - სოფელ კუშუბოურის მისასვლელი გზები, ბავშვები ვერ დადიან სკოლაში, მოსახლეობას ამოეწურა სურსათის მარაგი და ჩახერგილია წისქვილამდე მისასვლელი გზა.
„თოვლის სიმაღლემ ერთ მეტრს გადააჭარბა, ადგილობრივი ხელისუფლება კი ინერტულია და აუცილებელი სამუშაოს ჩატარებასაც ვერ ახერხებს. ჩვენ მივმართეთ ვანის მუნიციპალიტეტის გამგებელს და მოსახლეობასთან ერთად ველით პრობლემების მოგვარებას. თუ პარალიზებული სასიცოცხლო ობიექტები არ ამუშავდა, მუნიციპალიტეტის მესვეურთა უყურადღებობა შესაძლოა სავალალო შედეგებით დასრულდეს" - განაცხადა ლორთქიფანიძემ.
