დღეს, 12 მარტს ივ. ჯავახიშვილის სახელობის თბილისის სახელმწიფო უნივერსიტეტს ყირგიზეთის რესპუბლიკის განათლების მინისტრი კანატ სადიკოვი ეწვია.
კანატ სადიკოვი თსუ-ის მაგალითზე გაეცნო საქართველოში განხორციელებულ განათლების რეფორმას. თსუ რექტორმა ალექსანდრე კვიტაშვილმა სტუმარს უნივერსიტეტში მიმდინარე საგანმანათლებლო პროგრამები, სიახლეები, განხორციელებული და განსახორციელებელი პროექტები გააცნო: „ყირგიზეთის რესპუბლიკის განათლების მინისტრს აინტერესებს განათლების, კერძოდ, უმაღლესი განათლების სფეროში მიმდინარე რეფორმები. მათ შორის, შიდასაუნივერსიტეტო საგამოცდო პროცესები. ამასთან თსუ-ში ევროპისა და ამერიკის უნივერსიტეტებიდან უცხოელი პროფესორების ჯგუფია ჩამოსული. მათაც აინტერესებთ, თუ რა სიახლეებია განათლების სფეროში და თავად უნივერსიტეტში, რა პროგრამები ხორციელდება და როგორ ვაპირებთ სწავლის დონის ამაღლებას მომავალში." კანატ სადიკოვმა აღნიშნა, რომ ყირგიზეთში საქართველოს გამოცდილების გაზიარებას აპირებენ. „ჩვენ გვაინტერესებს ყველაფერი - პროგრამების რაოდენობა, აკრედიტაციის ევროსტანდარტების შესაბამისი სისტემა, სწავლების ტექნოლოგია, სტუდენტური ცხოვრება. ძალიან საინტერესოა კვლევითი ინსტიტუტების უნივერსიტეტებთან მიერთების ტენდენცია "- განაცხადა ყირგიზეთის რესპუბლიკის განათლების მინისტრმა. ყირგიზი სტუმარი იმ ოფიციალური დელეგაციის შემადგენლობაშია, რომელიც ჯანდაცვის, განათლების, სოციალური დაცვისა და საპენსიო პოლიტიკის სფეროებში ქართული გამოცდილების შესასწავლად ჩამოვიდა.
ყირგიზეთის რესპუბლიკის განათლების მინისტრის პარალელურად თსუ-ში საქართველოს განათლებისა და მეცნიერების სამინისტროს მიერ დაფინანსებული პროექტის „უცხოელი პროფესორები თსუ-ში" პრეზენტაცია გაიმართა. შეხვედრაში მონაწილეობდნენ თსუ რექტორი ალექსანდრე კვიტაშვილი, განათლებისა და მეცნიერების სამინისტროს წარმომადგენლები და უცხოელი პროფესორები.