"პუტინი ჩვენი პრეზიდენტი არ არის!", - ეს რუსეთის ოპოზიციის ახალი ლოზუნგია. სწორედ ეს ლოზუნგი დაემატება ოპოზიციის ძირითად მოთხოვნებსა და ლოზუნგებს ხვალ 10 მარტს ახალ არბატზე გამართულ მიტინგზე. ინფორმაციას ამის შესახებ რუსული მედია ავრცელებს.
მათივე ინფორმაციით, ხვალ დაგეგმილ ოპოზიციის მიტინგზე პირველად სიტყვას არჩევნებზე მყოფ დამკვირვებლებს მისცემენ. რუსეთის ოპოზოციის ერთ-ერთი წარმომადგენლის, "მემარცხენე ფრონტის" ლიდერის სერგეი უდალცოვის განცხადებით, მიტინგზე ასევე დამონტაჟებული იქნება დიდი ვიდეოეკრანები რომლებზეც ნაჩვენები იქნება სიუჟეტები 4 მარტს ჩატარებულ რუსეთის საპრეზიდენტო არჩევნებზე მომხდარი დარღვევების შესახებ.
"მოვიწვევთ იმ პოლიტიკოსებს, რომლებიც საპრეზიდენტო არჩევნების დღეს დამკვირვებლებად მუშაობდნენ. ამასთან ერთად მიტინგზე სიტყვით ასევე გამოვლენ მთელი პოლიტიკური სპექტრის წარმომადგენლები - ლიბერალები, მემარცხენეები, პატრიოტები და ამომრჩეველთა ლიგის წარმომადგენლები", _ აცხადებს ოპოზიციონერი.
მისივე თქმით, მიტინგის ძირითადი ლოზუნგები იქნება: "სამართლიანი არჩევნებისათვის", სამართლიანი ხელისუფლებისათვის" და "პუტინი ჩვენი პრეზიდენტი არ არის".