ამერიკის შეერთებული შტატების სახელმწიფო დეპარტამენტი ნარკოტიკების კონტროლის სტრატეგიის ანგარიშს აქვეყნებს.
დოკუმენტში ყურადღება საქართველოს ოკუპირებულ ტერიტორიებზეა გამახვილებული და ნათქვამია, რომ ცხინვალის რეგიონსა და აფხაზეთში ვითარება უკონტროლოა, ქართველ სამართალდამცველებს კი იქ ვითარების გაკონტროლების საშუალებას რუსი ოკუპანტები არ აძლევენ.
"ბევრ დამკვირვებელს მიაჩნია, რომ საქართველოს ოკუპირებული ტერიტორიები ნარკოტიკების კონტრაბანდის მთავარ კორიდორს წარმოადგენს. ცხინვალის რეგიონსა და აფხაზეთში კვლავ ვერ ხორციელდება საქართველოს კანონმდებლობის აღსრულება და არის მოსაზრება, რომ ნარკოტიკები ამ ტერიტორიების გავლით გადის.
ამ ინფორმაციის გადამოწმება შეუძლებელია, რადგან საქართველოს ხელისუფლებას რუსეთის საოკუპაციო ჯარები და ამ ტერიტორიების დე ფაქტო ხელისუფლების წარმომადგენლები ან ძალიან მცირე ოდენობით, ან საერთოდ არ უცვლიან ინფორმაციას ნარკოტიკების გადატანის შესახებ,"- ნათქვამია სახელმწიფო დეპარტამენტის ოფიციალურ საიტზე განთავსებულ ანგარიშში. წლევანდელ ანგარიშში საქართველო ნარკოტიკის არამწარმოებელ ქვეყანადაა შეფასებული.
ამერიკის შეერთებული შტატების სახელმწიფო დეპარტამენტის 2012 წლის ანგარიშს კანონმდებლები აფასებენ.
როგორც დეპუტატები აცხადებენ, ოკუპირებული აფხაზეთისა და ცხინვალის რეგიონის გავლით შესაძლოა ნარკოტრაფიკი მართლაც ხორციელდება, რადგან აღნიშნული ტერიტორიები სრულიად უკონტროლოა და საოკუპაციო რეჟიმი საქართველოს ხელისუფლებას ინფორმაციას არ აწვდის. ქართველი სამართალდამცველები ვითარებას ვერ აკონტროლებენ.
დეპუტატების განცხადებით, ყველა საერთაშორისო ორგანიზაციის დახმარებით ოკუპირებულ ტერიტორიებზე მდგომარეობა უნდა გამოსწორდეს.
