პირველად საქართველოში ტარდება Microsoft-ის ერთ-ერთი ყველაზე პრესტიჟული საერთაშორისო კონკურსი Imagine Cup. კონკურსში მონაწილეობის მიღება შეუძლია ნებისმიერ სტუდენტს, განურჩევლად უნივერსიტეტისა და ფაკულტეტისა (მინიმალური ასაკობრივი ზღვარი - 16 წელი). კონკურსანტებმა უნდა შექმნან მინიმუმ ერთი და მაქსიმუმ ოთხი წევრისგან შემდგარი გუნდი. გუნდს შეიძლება ჰყავდეს მენტორი. თითოეულ სტუდენტს მხოლოდ ერთი გუნდის წევრობა შეუძლია და თითოეულ მენტორს - მხოლოდ ერთი გუნდის მენტორობა. ყოველი გუნდი წარადგენს ერთ პროექტს.

კონკურსის პირველი ეტაპი ჩატარდება 15 აპრილამდე. ჟიურის მიერ გამოვლენილი 10 საუკეთესო გუნდი მონაწილეობას მიიღებს რეგიონალურ ფინალში 28 აპრილს. რეგიონალური ფინალი გაიმართება თბილისში. სამ გამარჯვებულ გუნდს გადაეცემა ფასიანი პრიზები. პირველ ადგილზე გასული გუნდი 6-10 ივლისს გაემგზავრება სიდნეიში, ავსტრალიაში, მსოფლიო ფინალში მონაწილეობის მისაღებად, სადაც მას ელის მსოფლიო აღიარება და 25 000 $.

კონკურსის მიზანია ამა თუ იმ გლობალური პრობლემის მოგვარება ტექნოლოგიური გადაწყვეტის გზით.

პროექტის ორგანიზატორები არიან Microsoft Georgia და განათლების მართვის საინფორმაციო სისტემა. მხარდამჭერები - საქართველოს განათლებისა და მეცნიერების სამინისტრო, USAID, EPIGeorgia, სინგულარ ჯგუფი, ალგორითმი.
ინფორმაციის მისაღებად და შეკითხვების მოსამზადებლად მსურველებმა უნდა იხილონ ვებგვერდები: www.imaginecup.ge და www.fb.com/imaginecupgeorgia