დსთ-ის ქვეყნებთან საგარეო სავაჭრო ბრუნვამ 2012 წლის იანვარში 204 მლნ. აშშ დოლარი შეადგინა (2011 წლის იანვართან შედარებით 3 პროცენტით მეტი), აქედან ექსპორტმა 79 მლნ. აშშ დოლარს მიაღწია (48 პროცენტით მეტი), ხოლო იმპორტმა - 125 მლნ. აშშ დოლარს (13 პროცენტით ნაკლები). საქართველოს საგარეო სავაჭრო ბრუნვაში დსთ-ის ქვეყნების წილი 32 პროცენტი იყო, მათ შორის ექსპორტში 51 პროცენტი და იმპორტში 25 პროცენტი. (2011 წელს - შესაბამისად 33, 36 და 32 პროცენტი). დსთ-ის ქვეყნებზე მოდიოდა სავაჭრო დეფიციტის 14 პროცენტი (2011 წლის იანვარში - 30 პროცენტი). 2012 წლის იანვარში, წინა წლის იანვართან შედარებით, აღნიშნულ ქვეყნებთან უარყოფითი სავაჭრო სალდო 50 პროცენტით შემცირდა.
2012 წლის იანვარში საქართველოს საქონლით საგარეო სავაჭრო ბრუნვამ (არაორგანიზებული ვაჭრობის გარეშე) 646 მლნ. აშშ დოლარი შეადგინა, რაც წინა წლის მაჩვენებელზე 8 პროცენტით მეტია; აქედან ექსპორტი 157 მლნ. აშშ დოლარი იყო (5 პროცენტით მეტი), ხოლო იმპორტი - 490 მლნ. აშშ დოლარი (8 პროცენტით მეტი). „საქსტატის" ინფორმაციით, საქართველოს უარყოფითმა სავაჭრო ბალანსმა 2012 წლის იანვარში 333 მლნ. აშშ დოლარი და საგარეო სავაჭრო ბრუნვის 51 პროცენტი შეადგინა.
სტატისტიკის ეროვნული სამსახურში აცხადებენ, რომ 2012 წლის იანვარში წინა წლებთან შედარებით ექსპორტის მნიშვნელოვანი ზრდა ფიქსირდება. განსაკუთრებით დიდი ზრდაა 2009 წლის იანვართან შედარებით (153 პროცენტი). იმპორტი და საგარეო სავაჭრო ბრუნვაც გაზრდილია სამივე წლის შესაბამისი პერიოდების მიმართ.