2011 წელს საქართველოს აეროპორტები 1 მლნ. 112 ათას 539 მგზავრს მოემსახურა, რაც 2010 წლის მონაცემებთან შედარებით 31.30 %-ითაა გაზრდილი. 2011 წელს ქვეყნის აეროპორტებიდან 7989 რეგულარული, ხოლო 2430 ჩარტერული ავიარეისი შესრულდა. 2011 წელს მთლიანობაში 10 ათას 328 ავიარეისია შესრულებული, რაც 2010 წლის მონაცემებთან შედარებით 25.08 %-ით მეტია.
სამოქალაქო ავიაციის სააგენტოს ინფორმაციით, 2011 წელს თბილისის საერთაშორისო აეროპორტიდან რეგულარული და არარეგულარული რეისებით, 977 ათას 294 მგზავრმა ისარგებლა, რაც 2010 წელთან შედარებით 29.12%-ითაა გაზრდილი. სტატისტიკური ინფორმაციის მიხედვით, 2010 წელს თბილისი საერთაშორისო აეროპორტმა 756 ათას 865 მგზავრი გაატარა.
რაც შეეხება ბათუმის საერთაშორისო აეროპორტს, ის 2011 წელს 126 ათას 783 მგზავრს მოემსახურა, ხოლო 2010 წელს კი 82 ათას 992 მგზავრს. სამოქალაქო ავიაციის სააგენტოს სტატისტიკური ინფორმაციის მიხედვით, 2011 წელს ბათუმის საერთაშორისო აეროპორტით 52.77 %-ით მეტმა მგზავრმა ისარგებლა.
სტატისტიკური ინფორმაციის მიხედვით, 2011 წელს ქუთაისის საერთაშორისო აეროპორტი 4 ათას 527 მგზავრს, ხოლო მესტიის თამარ მეფის სახელობის აეროპორტი 3 ათას 935 მგზავრს მოემსახურა.
