ნავთობპროდუქტების იმპორტიორთა კავშირის თავმჯდომარის ვანო მთვრალაშვილის განცხადებით, ევროკავშირის მიერ მიღებულ იქნა გადაწყვეტილება ირანულ ნავთობზე ემბარგოს დაწესებასთან დაკავშირებით. მთვრალაშვილის განმარტებით, აკრძალვები დაწესდება ნავთობისა და ნავთობპროდუქტების როგორც შესყიდვაზე, ასევე ტრანსპორტირებაზე, მათთან დაკავშირებულ საფინანსო და სადაზღვევო ოპერაციებზე. აიკრძალება აგრეთვე ირანში ექსპორტი ნავთობქიმიური კომპლექსების ტექნოლოგიურ აღჭურვაზე, ნავთობის მოპოვებაში განხორციელებულ ინვესტიციებზე და ერთობლივ პროექტებზე.

„აღნიშნული გადაწყვეტილებები ამოქმედდება მიმდინარე წლის 1 ივლისიდან. თუმცა ირანი ემბარგოს ამოქმედებამდე საპირისპირო ნაბიჯების გადადგმას აპირებს. კერძოდ, უახლოეს დღეებში ირანის პარლამენტში განიხილება კანონპროექტი ირანული ნავთობისა და ნავთობპროდუქტების ევრო კავშირის ქვეყნებში ექსპორტის აკრძალვასთან დაკავშირებით.
ცნობისათვის, ევრო კავშირის ქვეყნებში ირანული ნავთობის ექსპორტი შეადგენს ირანული ნავთობის მთელი ექსპორტის დაახლოებით 20-25 პროცენტს. აქედან 70 პროცენტი მოდის ისეთ ქვეყნებზე, როგორებიცაა საბერძნეთი, იტალია, ესპანეთი. მათგან ირანული ნავთობისა და ნავთობპროდუქტების ყველაზე დიდი მომხმარებელია საბერძნეთი, რომლის მოხმარებული ნავთობის დაახლოებით 35 პროცენტი მოდის ირანულ ნავთობზე. ემბარგოს დაწესების შესახებ გადაწყვეტილების მიღებამ საბერძნეთის შიდა ბაზარზე საწვავის ფასის 5-6 პროცენტით გაზრდა გამოიწვია"- აცხადებს ვანო მთვრალაშვილი.
მისივე ინფორმაციით, ყოველდღიურად ირანი ახორციელებს ევროპაში დაახლოებით 600 ათასი ბარელი ნავთობის ექსპორტს. აქვე შედარებისათვის უნდა მოვიყვანოთ ჩინეთი, რომელიც ყოველდღიურად ახორციელებს 500 ათასი ბარელი ირანული ნავთობის ექსპორტს. ირანული ნავთობის ერთ-ერთი მსხვილი ექსპორტიორი არიას ასევე ინდოეთი. უნდა აღინიშნოს, რომ აღნიშნული ქვეყნები თავისუფლად შეძლებენ ირანული ნავთობის ევროპაში ექსპორტის ჩანაცვლებას.
„რაც შეეხება ნავთობის ფასთან დაკავშირებულ პროგნოზს, სავალუტო ფონდის ვარაუდით, ირანულ ნავთობზე ემბარგოს დაწესება გამოიწვევს ნავთობის ფასის 20-30 პროცენტით გაზრდას, ხოლო ირანის მიერ ორმუზის სრუტის გადაკეტვა მას კიდევ უფრო მეტად გაზრდის. თუმცა არსებობს ასევე საპირისპირო პროგნოზები, რომლის მიხედვითაც, ნავთობის ფასი საერთოდ არ გაიზრდება.
დღეისათვის ნავთობის ფასი მსოფლიო ბირჟებზე მეტნაკლებად სტაბილურია. მ/წლის 26 იანვრის მდგომარეობით ნავთობის ფასი შეადგენს ლონდონში InterContinental Exchange Futures Europe-ზე (IСE Futures Europe) - 110,95 დოლარს/ბარელზე, ხოლო ნიუ-იორკში York Mercantile Exchange-ზე (NYMEX) - 99,70 დოლარს ბარელზე"- განმარტავს ვანო მთვრალაშვილი.
რაც შეეხება ნავთობპროდუქტების საერთაშორისო ფასს Platt's-ის მიხედვით, 2012 წლის 26 იანვრის მდგომარეობით A-92 ბენზინის ფასი შეადგენს 996.00 დოლარს/ტონაზე, L-62 დიზელის ფასი - 941.00 დოლარს/ტონაზე. წლის დასაწყისში (3.01.2012) ბენზინის ფასი შეადგენდა 948,50 დოლარს/ტონაზე, დიზელის ფასი - 938,25 დოლარს/ტონაზე.
საქართველოში საცალო ფასის კორექტირება ბოლოს დაფიქსირდა 2011 წლის 1 დეკემბერს, როდესაც მოხდა ფასების შემცირება ყველა სახეობის საწვავზე 5-5 თეთრით ლიტრაზე.