„2011 წელი ბიზნესის განვითარებისთვის ძალიან მნიშვნელოვანი წელი იყო. მოხდა სხვადასხვა მიმართულებით ბიზნესის დივერსიფიკაცია, როგორც გეოგრაფიული თვალსაზრისით ასევე ვერტიკალური ინტეგრაციის თვალსაზრისით. 2011 წელს „გუდვილი" გადავიდა ბიზნესის სხვა სფეროებშიც ეს არის ტექსტილის მაღაზია „მერლინი", რომელიც 2011 წლის დასაწყისშივე გაიხსნა. 2011 წელს მომხმარებელს ბევრი ახალი პროექტი შევთავაზეთ, როგორიცაა „სოკარის" მულტიფუნქციური კომპლექსი და სადაც „გუდვილი" ფუნქციონირებს. ასორტიმენტის თვალსაზრისით 2011 წელს მომხმარებელს საფრანგეთიდან ექსკლუზიური იმპორტი შევთავაზეთ „ოშანის" პროდუქტისა, რომელიც ევროპაში წამყვანი სუპერმარკეტების ქსელია. 2011 წლის ბოლოს გავხსენით რიგით მეორე ჰიპერმარკეტი. 2011 წელს ჩვენმა აქტიობამ 100 მლნ. დოლარს გადააჭარბა"- განაცხადა „გუდვილის" საზოგადოებასთან ურთიერთობის სამსახურის უფროსმა ნატა დარჩიაშვილმა.

რაც შეეხება 2012 წელს „გუდვილს" საკმაოდ ბევრი სიახლე აქვს დაგეგმილი. წლის ბოლომდე „გუდვილი" მომხმარებლებს „მარშეს" პროდუქციას შესთავაზებს, რომელიც თბილისში იქნება წარმოებული და მთელი ქვეყნის მასშტაბით გაიყიდება. საწარმო „მარშეს" მშენებლობა, თბილისში კინო-თეატრ „საქართველოს" მახლობლად მიმდინარეობს, სადაც 4500-ზე მეტი პროდუქციის წარმოება მოხდება და რომელიც „მარშეს" ბრენდის ქვეშ გაიყიდება. როგორც დღეს გამართულ ბრიფინგზე „გუდვილის" გენერალურმა დირექტორმა მიხეილ ჩარკვიანმა განაცხადა, "გუდვილის" ბიზნეს სტრატეგია რამდენიმე მიმართულებითYიცვლება.

„2012 წლიდან ჩვენს მომხმარებელს შევთავაზებთ „გუდვილის" ყველაზე მასშტაბურ და ამბიციურ პროექტს, ჩვენს ახალ ბრენდს, "მარშე"-ს, რომელიც ცენტრალიზებულ საწარმოო ხაზს, საბითუმო სავაჭრო ცენტრს და დაფასოებელ საამქროს გააერთიანებს. პროექტის ღირებულება 30 მილიონი ევროა და მისი მასშტაბურობა რამდენიმე პარამეტრით განისაზღვრება. 3 ჰექტარ ფართობზე განთავსებულია შენობები, სადაც კომპლექსურად ჩვენი კომპანიის ახალი მიმართულებები გადანაწილდა. კომპლექსში ცენტრალიზებულად იწარმოება 4500 სახეობის პროდუქტი: მათ შორის: ძეხვი და სოსისეული, საკონდიტრო ნაწარმი, კულინარია, პურ-ფუნთუშეული, რძისა და თევზის წარმოება. წარმოებისთვის საჭირო ყველა დანადგარი ევროპის წამყვანი კომპანიებისგან ჩამოვიტანეთ. მათ მაღალტექნოლოგიურ ფუნქციებს და თანამედროვე მსოფლიო სტანდარტების შესაბამისობას ხარისხის სერთიფიკატები ადასტურებს" აცხადებს „გუდვილის" გენერალური დირექტორი მიხეილ ჩარკვიანი.
როგორც ჩარკვიანი განმარტავს, პროექტის ფარგლებში შეიქმნება სადისტრიბუციო არხები, რომლებიც "მარშეს" პროდუქციით თბილისის გარდა რეგიონებსაც მოამარაგებს.

„ჩვენ ვიქნებით როგორც პროდუქტის იმპორტიორი, ასევე მწარმოებელი კომპანია, რომელიც ვერტიკალური ინტეგრაციის გზით ვითარდება და გადადის ახალ ბაზრებზეც. "მარშე" 500 მდე ადამიანს დაასაქმებს - განაცხადა „გუდვილის" გენერალურმა დირექტორმა მიხეილ ჩარკვიანმა.

„გუდვილის" მენეჯმენტის ინფორმაციით, 2012 წელს დაგეგმილია „გუდვილი გლდანის" გახსნა, რომელიც 22000 კვ/მ-ს მოიცავს. ასევე 2012 წლისთვისაა დაგეგმილი „გუდვილი-ვაკის" (3700 კვ/მ სუპერმარკეტი+5კვ/მ სწრაფი კვების ობიექტი), „გუდვილი ბათუმის" (3000 კვ/მ სუპერმარკეტი+სწრაფი კვების ობიექტი), „გუდვილი რუსთაველის" (1900 კვ/მ სუპერმარკეტი) და „სოკარის" მულტიფუნქციურ კომპლექსებში „გუდვილის" სუპერმარკეტებისა და სწრაფი კვების ობიექტების გახსნა.

„კომპანია ოპერირებას გაუწევს ჰიპერ და სუპერმარკეტების ქსელს მთელი საქართველოს მასშტაბით, გააფართოებს ბულანჟერიებს და კაფეტერიებს, გააგრძელებს „სოკართან" ერთად მულტიფუნქციური კომპლექსების სავაჭრო და სწრაფი კვების ობიექტებით უზრუნველყოფას და რაც მთავარია", - აცხადებს მიხეილ ჩარკვიანი.