დღეს, 26 იანვარს, 14:00 საათზე, "შერატონ მეტეხი პალასში" გაიხსნება ევროგაერთიანების მიერ დაფინანსებული ახალი პროექტი. ღონისძიებას დაესწრება საქართველოს ეკონომიკისა და მდგრადი განვითარების მინისტრის პირველი მოადგილე, ირაკლი მატკავა.
საქართველოს ხარისხის ინფრასტრუქტურის თანადათანობით დაახლოება ევროპულ პრაქტიკასთან წარმოადგენს ერთ-ერთ წინაპირობას საქართველოსა და ევროგაერთიანებას შორის ღრმა და ყოვლისმომცველი თავისუფალი სავაჭრო შეთანხმების (DCFTA) გაფორმებისთვის.
1.15 ევროს ღირებულების პროექტი მოამზადებს საფუძველს მსოფლიოში აღიარებული შესაბამისობის შეფასების სისტემის დანერგვისთვის, რომლის საშუალებით შეიძლება განისაზღვროს, თუ რამდენად შეესაბამება პროდუქტები და სერვისები ხარისხის და უსაფრთხოების მისაღებ დონეს. საქართველოს აკრედიტაციის ცენტრი (GAC) განავითარებს შეფასების კრიტერიუმებს და ჩაატარებს შეფასებებს, რის შედეგადაც დადგინდება, თუ რამდენად პასუხობს ევროპულ და საერთაშორისო კრიტერიუმებს შესაბამისობის შეფასების ის ორგანოები (ტესტირების და კალიბრაციის ლაბორატორიები, სერტიფიკაციის და ინსპექტირების ორგანოები), რომლებიც ასრულებენ ქართული პროდუქტების და სერვისების შესაბამისობის შეფასებას.
გერმანულ-ლატვიური კონსორციუმი, რომელიც შექმნილია მასალების კვლევის და ტესტირების ფედერალური ინსტიტუტისა და ლატვიის ეროვნული აკრედიტაციის ბიუროს (LATAK) თანამშრომლობის საფუძველზე, განახორციელებს პროექტს საქართველოს აკრედიტაციის ცენტრთან ერთად (GAC).
პროექტს აქვს "დაწყვილების" ("twinning") ფორმა. ეს გულისხმობს იმას, რომ ევროგაერთიანების წევრი ქვეყნების ორგანოები და დაწესებულებები საკუთარ ცოდნას და გამოცდილებას გადასცემენ ბენეფიციარ ქვეყანას.