სოფლის მეურნეობის მინისტრი ზაზა გოროზია სამუშაო ვიზიტით გერმანიაში იმყოფებოდა, სადაც მონაწილეობა მიიღო ბერლინში, სასოფლო -სამეურნეო პროდუქციის საერთაშორისო გამოფენის ,,მწვანე კვირეულის" გახსნის ცერემონიალში.
სოფლის მეურნეობის სამინისტროს ინფორმაციით, ,მწვანე კვირეული" მსოფლიოში ერთ-ერთი ყველაზე დიდი სასოფლო-სამეურნეო პროდუქციის გამოფენაა, რომელშიც მსოფლიოს სხვადასხვა ქვეყნებიდან ასობით კომპანია მონაწილეობს და საკუთარ პროდუქციას წარადგენს. საერთაშორისო გამოფენაზე საქართველო ადგილობრივი წარმოების ღვინით და ბიო პროდუქტებით იყო წარმოდგენილი. აღსანიშნავია, რომ ქართული სტენდი გერმანიის ეკონომიკური თანამშრომლობისა და განვითარების მინისტრის მოადგილემ, გუდრუნ კოპპიმ მოინახულა და ქართული ღვინოც დააგემოვნა.
,მწვანე კვირეულის" პარალელურად, ბერლინი 2012 წლის სოფლის მეურნეობის მინისტრთა საერთაშორისო სამიტს მასპინძლობდა, რომელშიც საქართველოს სოფლის მეურნეობის მინისტრი, ზაზა გოროზიაც მონაწილეობდა. სამიტს მსოფლიოს 80 ქვეყნის სოფლის მეურნეობის მინისტრები ესწრებოდნენ.
ვიზიტის ფარგლებში, ზაზა გოროზიამ ორმხრივი შეხვედრა გამართა გერმანიის სურსათის, სოფლის მეურნეობის და მომხმარებელთა დაცვის მინისტრთან ილზე აიგნერთან, სადაც საქართველოსა და გერმანიას შორის სოფლის მეურნეობის დარგის განვითარების კუთხით სამომავლო ურთიერთობის საკითხები განიხილეს. ზაზა გოროზიამ გერმანელი კოლეგა საქართველოში მოიწვია, რასაც ილზე აიგნერი სიამოვნებით დათანხმდა.
,,ჩვენ განვიხილეთ ორ ქვეყანას შორის ურთიერთთანამშრომლობის საკითხები. 2012 წელს, გერმანული მხარე სოფლის მეურნეობის, კერძოდ მეცხოველეობის დარგში მომუშავე სპეციალისტების გადამზადებაში დაგვეხმარება, რაც ამ სექტორის განვითარებას შეუწყობს ხელს," - განაცხადა ზაზა გოროზიამ.
ვიზიტის ფარგლებში, გოროზიამ ასევე ორმხრივი შეხვედრები გამართა ესტონეთის, უკრაინისა და ლატვიის სოფლის მეურნეობის მინისტრებთან და ამ სექტორში მომუშავე კომპანიების ხელმძღვანელებთან.