პორტირებული აბონენტების სტატისტიკა შემდეგნაირად გამოიყურება: სააბონენტო ნომრის პორტაბელურობის დანერგვის დღიდან მოზიდული აბონენტების რაოდენობით "ჯეოსელი" ლიდერობს და 2012 წლის 20 იანვრის მონაცემებით "ჯეოსელიდან" სხვა მობილურ ქსელში 32 914 აბონენტი გადავიდა, ხოლო "ჯეოსელში" კონკურენტი კომპანიებიდან 45 386 აბონენტი გადაპორტირდა.

მეორე ადგილზეა კომპანია "მობიტელი", იგივე "ბილაინი", საიდანაც სხვა მობილურ კომპანიებში 19 413 აბონენტი გადავიდა, ხოლო კომპანიამ პორტირების შედეგად 23 996 აბონენტი შეიძინა.
კომპანია "მაგთიკომი", სადაც სხვა მობილური ქსელებიდან 30 847 აბონენტი გადავიდა, ხოლო "მაგთიკომიდან" კონკურენტი კომპანიების მობილურ ქსელებში 47 902 აბონენტი წავიდა.
დაბოლოს, კომპანია "სილქნეტი", სადაც კონკურენტი კომპანიებიდან 4 მობილური ქსელის აბონენტი გადავიდა.

შეგახსენებთ, რომ სააბონენტო ნომრის პორტირება მობილურ ქსელში 2011 წლის 15 თებერვლიდან დაიწყო.

ფიქსირებულ ქსელში სააბონენტო ნომრის პორტირების მომსახურება 2011 წლის 1-ელ დეკემბერს დაიწყო. საერთო ჯამში, ფიქსირებული სადენიანი და ფიქსირებული უსადენო ქსელის ათასამდე აბონენტმა ისარგებლა ნომრის პორტირებით. სტატისტიკა შემდეგნაირად გამოიყურება: "ნიუ-ნეტში" 16 აბონენტი გადავიდა კონკურენტი კომპანიებიდან, "ნიუ-ნეტიდან" კი 63 აბონენტი წავიდა.
კომპანია "მაი ფონმა" სამი აბონენტი შეიძინა და სამი აბონენტი დაკარგა. ფიქსირებულ ქსელში სააბონენტო ნომრის პორტირების შედეგად ყველაზე მეტი აბონენტი კომპანია "სილქნეტმა" შეიძინა - 900 აბონენტი კონკურენტი კომპანიებიდან. "სილქნეტიდან" კონკურენტ კომპანიებში ჯერჯერობით არც ერთი აბონენტი არ წასულა.

საქართველოს კომუნიკაციების ეროვნული კომისია კიდევ ერთხელ განმარტავს, რომ სააბონენტო ნომრის პორტირების ტექნოლოგიის დანერგვის წარმატება იზომება არა პორტირებული აბონენტების სტატისტიკის სიდიდით, არამედ ოპერატორებს შორის მძაფრი კონკურენციის გაღვივების ხელშეწყობით. კონკურენციის გამძაფრება, თავის მხრივ, პირდაპირპროპორციულად აისახება სატელეფონო მომსახურების მიმწოდებელი ოპერატორების სატარიფო პოლიტიკაზე. ეს ყველაფერი კი, სააბოლო ჯამში, მომხმარებელების კეთილდღეობას ემსახურება. რაც საქართველოს კომუნიკაციების ეროვნული კომისიის უმთავრეს მიზანს წარმოადგენს.