უახლოეს წლებში საქართველოს ენერგეტიკულ სექტორში 1 მლრდ. დოლარის თურქული ინვესტიციის განხორციელება იგეგმება, - ამის შესახებ საქართველო-თურქეთის ენერგეტიკული კონფერენციის დასრულების შემდეგ, საქართველოს პრემიერ-მინისტრმა ნიკა გილაურმა განაცხადა.
პრემიერ-მინისტრის განმარტებით, ბოლო 2 წლის განმავლობაში ახალი ჰესების მშენებლობაზე 40-ზე მეტი ხელშეკრულება გაფორმდა და უმეტესი ნაწილი თურქული ინვესტიციებით აშენდება.
გილაურის განმარტებით, ჰესებიდან გამომუშავებული ელეტროენერგიის ნაწილი ადგილზე, საქართველოში მოიხმარება, ხოლო ნაწილიც ექსპორტზე გავა.
კონფერენციაზე, რომელსაც დღეს სასტუმრო „რადისონი" მასპინძლობდა
ორ ქვეყანას შორის ენერგეტიკულ, სავაჭრო და საინვესტიციო სფეროებში თანამშრომლობის საკითხებზე მსჯელობდნენ.
დღესვე საქართველოს ენერგეტიკისა და ბუნებრივი რესურსების მინისტრმა ალექსანდრე ხეთაგურმა და თურქეთის ენერგეტიკის მინისტრმა ტანერ ილდიზმა ბორჩხა-ახალციხეს დამაკავშირებელი 400 კვ-იანი ელექტროგადამცემი ხაზით ელექტროენერგიის ტრანს-სასაზღვრო ვაჭრობის შესახებ საერთაშორისო ხელშეკრულებას მოაწერეს ხელი.
თურქეთის ენერგეტიკისა და ბუნებრივი რესურსების მინისტრი ტანერ ილდირი საქართველოში ოთხდღიანი სამუშაო ვიზიტით 19 იანვარს ჩამოვიდა.
ვიზიტის ფარგლებში, 21 იანვარს თურქული დელეგაცია ბათუმს ეწვევა, სადაც შეხვედრას კულტურისა და ძეგლთა დაცვის მინისტრთან ნიკოლოზ რურუასთან და აჭარის მთავრობის თავმჯდომარესთან ლევან ვაშალომიძესთან გამართავს.
