ეროვნულ ბანკს კერძო საფინანსო სექტორის მიმართ ზედამხედველობის უფლებამოსილება გაეზარდა. აღნიშნულთან დაკავშირებით პარლამენტმა ცვლილებები "ეროვნული ბანკის შესახებ" კანონში შეიტანა.
დღემდე ეროვნულ ბანკს მინიჭებული აქვს სრული უფლებამოსილება, ზედამხედველობა გაუწიოს კომერციული ბანკების, არასაბანკო სადეპოზიტო დაწესებულებების, მიკროსაფინანსო ორგანიზაციების, სადაზღვევო ორგანიზაციების, გადამზღვეველი კომპანიების, არასახელმწიფო საპენსიო სქემების დამფუძნებლების, ფასიანი ქაღალდების დამოუკიდებელი რეგისტრატორების, საბროკერო კომპანიების, საფონდო ბირჟის, ცენტრალური დეპოზიტარის, სპეციალიზებული დეპოზიტარის, აქტივების მმართველი კომპანიებისა და ანგარიშვალდებული საწარმოების საქმიანობას ამ ორგანული კანონისა და საქართველოს კანონმდებლობის საფუძველზე.
მიღებული გადაწყვეტილების თანახმად, ეროვნულ ბანკს უკვე შეუძლია საზედამხედველო ფუნქციების განხორციელებისთვის, ამ პირებისგან მოითხოვოს და მიიღოს ნებისმიერი ინფორმაცია, მათ შორის, კონფიდენციალური, საკუთარი კომპეტენციის ფარგლებში.
ამასთანავე, ეროვნული ბანკი უფლებამოსილია, ფულადი გზავნილების განმახორციელებელი პირებისა და ვალუტის გადამცვლელი პუნქტებისაგან მოითხოვოს და მიიღოს ნებისმიერი ფინანსური და სტატისტიკური ინფორმაცია თავის მიერ დადგენილი წესის შესაბამისად.
ასევე, ეროვნულ ბანკს მიეცა უფლებამოსილება, რომ უკანონო შემოსავლის ლეგალიზაციის აღკვეთის ხელშეწყობის მიზნით, ითანამშრომლოს ადგილობრივ საზედამხედველო და სამართალდამცავ ორგანოებთან.