„ფედერაციის ეს გადაწყვეტილება არის კიდეც ერთი შანსი იმ სპორტსმენებისთვის, რომლებმაც დაუშვეს შეცდომა. ბოლო თვეების განმავლობაში მკვეთრად შეიცვალა სიტუაცია ამ მიმართულებით უკეთესობისაკენ და ფედერაციამ ჩათვალა საჭიროდ, რომ ამ სპორტსმენებს მიეცეთ კიდევ ერთი შანსი. სპორტსენების ვალია გამოსყიდონ დანაშაული და გამოავლინონ პროფესიონალიზმი. აქდან გამომდინარე, მე ვფიქრობ რომ ფედერაციის გადაწყვეტილება სწორია",- განაცხადა ასანიძემ.

მისი განცხადებით სპორტში არ შეიძლება ხდებოდეს კორუფციული გარიგებები. სპორტული მიმართულებები, მსაჯთა კორპუსის ჩათვლით, დაფინანსდნენ და სამომავლოდ უკეთესი შედეგები არის მოსალოდნელი.

შეგახსენებთ რომ, ფეხბურთის ფედერაციის გადაწყვეტილებით 5 ფეხბურთელს დისკვალიფიკაცია მოეხსნა. ამასთან დაკავშირებით სფფ-მ სპეციალური განცხადება გააკეთა. განცხადებაში საუბარია, ფულად მაქინაციებში ეჭვმიტანილი 5 ფეხბურთელზე - გიგა ბეჭვაია („ვიტ ჯორჯია"), როინ ონიანი, ლევან ვართაგავა (ორივე „ბაია"), სპარტაკ გოგია და კახა კირთაძე. (ორივე „სამტრედია"). მათ სამუდამო დისკვალიფიკაცია მიეცათ და აეკრძალათ ნებისმიერი სახის საფეხბურთო საქმიანობა.

"ვინაიდან, ფინანსურ მაქინაციებში ბრალდებული ქართველი ფეხბურთელები, უპირველეს ყოვლისა, ფეხბურთელები არიან და მათი უმთავრესი დანიშნულება ფეხბურთისათვის სამსახურია, დღეს, საქართველოს ფეხბურთის ფედერაციის პრეზიდენტმა, ზვიად სიჭინავამ მიიღო ერთპიროვნული გადაწყვეტილება, მიეცეს მეორე შანსი და უფლება - გიგა ბეჭვაიას („ვიტ ჯორჯია"), როინ ონიანს, ლევან ვართაგავას (ორივე „ბაია"), სპარტაკ გოგიას და კახა კირთაძეს (ორივე „სამტრედია") დაუბრუნდნენ საფეხბურთო საქმიანობას", - ნათქვამია განცხადებაში და აღნიშნულია, რომ ამ ფეხბურთელთაგან, ზოგიერთმა მთელი შეგნებული ცხოვრება ფეხბურთს შესწირა; ნაწილი, კი სწორედ ახლა იწყებდა საფეხბურთო კარიერას, რაც განსაკუთრებით ამძიმებდა საფეხბურთო ოჯახიდან მათი მოკვეთის ფაქტს. სწორედ ამიტომ, სფფ-ის პრეზიდენტმა მიიღო გადაწყვეტილება და გამოსცა უპრეცენდენტო ამნისტია."