"ჩვენთვის აბსოლუტურად ამას არანაირი მნიშვნელობა არ აქვს. ვისაც უნდა იმან შეგვამოწმოს, ეს იქნება კონტროლის პალატა თუ სხვა უწყება. ეს ჩვენთვის პრობლემას არ წარმოადგენს. პრობლემა არის ის, რამდენად გაიმართება ეს მექანიზმი და მთავარია, რომ ხელი არ შეუშალოს პოლიტიკურ პარტიებს თავისი საქმიანობის განხორციელებაში", - განაცხადა "ჯი-ეიჩ-ენთან" საუბრისას ხიდაშელმა.

მისი თქმით, "გაცილებით საინტერესოა, პარტიებთან დაკავშირებულ პირებთან დაკავშირებით რა მექანიზმებს შემოგვთავაზებს კონტროლის პალატა".

"სინამდვილეში საფრთხის მატარებელი ეს ნაწილი შეიძლება იყოს. კონტროლის პალატა, რომელიც არის საბიუჯეტო ხარჯების მონიტორინგის მთავარი ორგანიზაცია, თავის ფუქნციას, რომ კარგად ასრულებდეს ქვეყნისთვისაც კარგი იქნებოდა და თავად მათი პრესტიჟისთვისაც. იმედია, რომ ადამიანებს სახლებში არ მიადგებიან პროკურატურის მთავარი თანამშრომლები და არ დაუწყებენ დაკითხვებს. კიდევ ერთხელ ვამბობ, რომ პარტიებთან დაკავშირებით პრობლემა არ არის. პრობლემა შეიძლება შეიქმნას დაკავშირებულ პირებთან დაკავშირებით", - განაცხადა "ჯი-ეიჩ-ენთან" საუბრისას ხიდაშელმა.

შეგახსენებთ, რომ პოლიტიკური პარტიების ფინანსური საქმიანობის კანონიერებასა და გამჭვირვალობაზე მონიტორინგის განხორციელება საქართველოს კონტროლის პალატას დაევალა
2011 წლის 30 დეკემბერს, ძალაში შევიდა საკანონმდებლო ცვლილებები „მოქალაქეთა პოლიტიკური გაერთიანებების შესახებ" საქართველოს ორგანულ კანონში. კანონის შესაბამისად, საქართველოში რეგისტრირებული პოლიტიკური პარტიების ფინანსური საქმიანობის კანონიერებასა და გამჭვირვალობაზე მონიტორინგის განხორციელება საქართველოს კონტროლის პალატას დაევალა.
კანონით მონიჭებული მანდატის ფარგლებში, საქართველოს კონტროლის პალატა ეფექტიანი კომუნიკაციის მეთოდების საშუალებით მჭიდროდ თანამშრომლობს ყველა პოლიტიკურ პარტიასთან, რაც ინფორმაციის სწრაფად მიღებისა და ანალიზის პროცედურას მნიშვნელოვნად აადვილებს. ამის შესახებ ნათქვამია კონტროლის პალატის აღნიშნულთან დაკავშირებული გავრცელებულ ინფორმაციაში.