2012 წლიდან, კომპანია "დიო" პროდუქციის ექსპორტზე გატანას გეგმავს. როგორც კომპანიის დამფუძნებელმა და გენერალურმა დირექტორმა ირმა დაუშვილმა სააგენტო "ჯი-ეიჩ-ენთან" საუბრისას განაცხადა, მომავალი წლიდან კომპანია პროდუქციას აზერბაიჯანსა და სომხეთში გაიტანს და ეტაპობრივად შეეცდება ამიერკავკასიის ბაზარი მოიცვას.
"2012 წლის გეგმებში შედის ჩვენი პროდუქცია აზერბაიჯანსა და სომხეთში გავიტანოთ და გავხდეთ ექსპორტიორი კომპანია. გვინდა, რომ ამიერკავკასიის ბაზარზე აქტიურად ვიმუშაოთ"- განაცხადა დაუშვილმა.
2012 წლიდანვე "დიო" მომხმარებლებს ახალი პროდუქტებს შესთავაზებს, მათ შორის იაპონურ პანელებს, რომელიც "დიოს" დამფუძნებლის პროგნოზით, 2012 წელს საკმაოდ პოპულარული გახდება.
"ჩემი აზრით, 2012 წლიდან მოდაში იქნება როლეტები - რომაული ფარდები და იაპონური პანელები"- აცხადებს ირმა დაუშვილი.
რაც შეეხება 2011 წელს, კომპანია "დიო" დადებითად აფასებს, რადგანაც კომპანიამ 2011 წელი დაახლოებით 27 %-იანი ზრდით დაასრულა.
"2011 წელი "დიოსთვის" საკმაოდ წარმატებული წელი იყო. წელს გვაქვს 27 %-იანი ზრდა, რაც დღეისათვის საკმაოდ კარგი მაჩვენებელია, რადგანაც იყო პერიოდი, როცა სახეზე იყო კლება. 2008 წლის შემდეგ იყო კრიზისის წლები. "დიოს" მაგალითზე შემიძლია ვთქვა, რომ ჩვენმა კომპანიამ კრიზისი დაძლია და წინ მიიწევს. გავხსენით ახალი წარმოება და საგამოფენო დარბაზი. ვცდილობთ, რომ ახალი ძალებითა და ახალი ენერგიით ვიმუშაოთ. 2011 წელი ფინანსურად ჯერ შეფასებული არ გვაქვს, რადგანაც მოგეხსენებათ წელი ჯერ არ დასრულებული. 2011 წელს, ჩვენი პროდუქციიდან, ყველაზე დიდი პოპულარულობით სარგებლობდა ფრანგული კომპანია BARRISOL-ის გასაჭიმი ჭერი. წელსვე პოპულარული იყო ასევე ე.წ. სკრინ როლეტი ჟალუზები"- აღნიშნა "ჯი-ეიჩ-ენთან" საუბრისას "დიოს" დამფუძნებელმა.
კომპანია "დიო" ამ დროისათვის ბაზრის 58 %-ს აკონტროლებს.
"დიო" - ეს არის მაღალი რეპუტაციის მქონე ქართული კომპანია, რომელიც 2004 წლიდან ფლობს ISO 9001:2008 ხარისხისა და მენეჯმენტის სერტიფიკატს.
შპს,,დიო" უმაღლესი ხარისხის ევროპული მასალებისგან აწარმოებს შემდეგ პროდუქციას: PVC კარ-ფანჯრებსა და მზისგან დამცავ სისტემებს - ვერტიკალურ, ჰორიზონტალურ ფარდა-ჟალუზებს, ტენტებს, რომაულ ფარდებსა და ფარდა როლეტებს. აგრეთვე, ავტოფარეხის კარს დისტანციური მართვით, გარე დამცავ ჟალუზებს, ფრანგულ გასაჭიმ ჭერს, ჭიშკრის ძრავსა და შლაგბაუმებს.
,,დიოს" პროდუქციის მომხმარებლები არიან როგორც კერძო პირები, ასევე ადგილობრივი და საერთაშორისო ორგანიზაციები მთელი საქართველოს მასშტაბით.
შპს `დიო"-ს მფლობელობაშია ახალაშენებული, უმაღლესი ხარისხის თანამედროვე ტექნოლოგიებით აღჭურვილი ქარხანა საქართველოს დედაქალაქ თბილისში. კომპანიას აქვს რეგიონალური ოფისები საქართველოს სხვადასხვა ქალაქებში - ქუთაისში, ბათუმსა და თელავში.
