მისი თქმით, სამმა საერთაშორისო სარეიტინგო სააგენტომ fitch-მა, standard&poor,s-მა და moodis-მა რამდენიმე კვირის წინ შეისწავლეს ქვეყნის ეკონომიკური, პოლიტიკური, ასევე გეოპოლიტიკური პრობლემები. გაეცნენ რეფორმებს და მაშინ, როდესაც მსოფლიოს ბევრ ქვეყანას და მათ შორის ევროკავშირის ქვეყნებს შეუმცირდათ რეიტინგი, ორმა კომპანიამ - fitch-მა და standard&poor,s-მა საქართველოს რეიტინგი B+-იდან BB-მდე აწია.

"როგორც სააგენტოს მიერ გავრცელებულ ინფორმაციაში წერია, აღნიშნული გამოწვეულია საგარეო ვალის კლების ტენდენციით, რომ რეფორმებმა გამოიღო ნაყოფიერი შედეგი, ინვესტირება ხდება ინფრასტრუქტურაში, ექსპორტი დივერსიფიცირებულია. ასევე ქვეყანაში ხდება ბიზნესკლიმატის ხელშეწყობა ინვესტორებისთვის. შეიმჩნევა ეკონომიკის ზრდის კარგი მაჩვენებელი, აღინიშნიულია, რომ მთავრობას შესწევს უნარი, შეამციროს დეფიციტი ინფლაციის კლებითა და სავალუტო რეზერვების გაზრდით", - აღნიშნა გილაურმა.

მისი შეფასებით, აღნიშნული რეიტინგის გამოქვეყნება არის საქართველოსთვის დამატებითი რეკლამა, რათა ინვესტორებს, რომლებსაც ჯერ არ აქვთ გადაწყვეტილი, სად დააბანდონ საკუთარი ინვესტიციები, ინფორმაცია მიეწოდებათ. პრემიერმა აღნიშნა, რომ ევროპაში მიმდინარე ეკონომიკური კრიზისის ფონზე განსკუთრებით მნიშვნელოვანია საქართველოში მაკროეკონომიკური სტაბილურობის შენარჩუნება, რასაც ზემოთ აღნიშნული საერთაშორისო სააგენტოებიც ხაზს უსვამენ.

"ამ ფონზე იზრდება საქართველოს უპირატესობა, როგორც მიმზიდველი ადგილისა, ინვესტიციებისთვის. ეს ყველა ქართველი მეწარმის უპირატესობაა და ახალი დამატებითი იმპულისი სამუშაო ადგილების შესაქმნელად", - მიაჩნია გილაურს.