ხულოში ექსპლუატაციაში რამდენიმე ახალი ობიექტი შედის, მათ შორის სასტუმრო "ხულო", რომელიც ტბელ აბუსერიძის № 2 - ში მდებარეობს. აჭარის ტურიზმის დეპარტამენტის ინფორმაციით, სასტუმროში ორადგილიანი 12 ოთახია განთავსებული, 8 სტანდარტული და 4 ლუქსის ტიპის ნომრებით. დეპარტამენტში აცხადებენ, რომ მსგავსი ტიპის სასტუმროს გახსნა მნიშვნელოვანია ტურისტული ინფრასტრუქტურის განვითარების კუთხით. ხულო მაღალმთიანი აჭარის ერთ-ერთი გამორჩეული ადგილია, მდიდარი როგორც კულტურული, ისე ბუნების მრავალფეროვნებით.
"აქ ჩამოსულ სტუმარს ამიერიდან შეეძლება კომფორტულად განთავსდეს აღნიშნულ სასტუმროში და უკეთ გაეცნოს რეგიონს. ხულოს მუნიციპალიტეტს უკვე განახლებული და ახლად აშენებული დრამატული თეატრი, საავადყოფო, ბიბლიოთეკა, არქივი და ახალგაზრდული ცენტრი შეემატა", - აცხადებენ აჭარის ტურიზმის დეპარტამენტში.
