საქართველოს სტატისტიკის ეროვნულ სამსახურში 12 დეკემბრიდან 16 დეკემბრის ჩათვლით საქსტატისა და შვედეთის სტატისტიკის ერთობლივი პროექტის ფარგლებში ჩატარდება სასწავლო ტრენინგი თემაზე „სტატისტიკური კვლევის მეთოდები".
სასწავლო კურსს საქსტატში შვედი ექსპერტები ჩაატარებენ. აღნიშნული ტრენინგი წარმოადგენს სტატისტიკური კვლევის მეთოდების ხუთ კვირიანი კურსის მესამე კვირას. ამ კურსის ფარგლებში საქსტატის თანამშრომლები გაეცნობიან სტატისტიკური კველვების შერჩევის მეთოდებს, კერძოდ კი კლასტერული შერჩევის საფუძვლებს. სასწავლო კურსის დასასრულს საქსტატის თანამშრომლებს განვლილი კურსის შემაჯამებელი გამოცდა ჩაუტარდებათ.
საქსტატსა და შვედეთის სტატისტიკას შორის 3-წლიანი თანამშრომლობის პროექტის ფარგლებში შვედეთის სტატისტიკა საქსტატს ტექნიკურ დახმარებას უწევს ინფლაციის, მთლიანი შიდა პროდუქტის, თანამშრომელთა ტრენინგის, და სხვა ძირითადი სტატისტიკური კომპონენტების ხარისხის გაუმჯობესების მიმართულებით. პროექტის ბიუჯეტი 4 მილიონი ლარის ექვივალენტს შეადგენს შვედურ კრონებში და მთლიანად დაფინანსებულია შვედეთის საერთაშორისო განვითარების სააგენტოს (SIDA) მიერ.
