ფრაქცია "ერთობა სამართლიანობისთვის" რეპრესიების მსხვერპლთა შესახებ კანონში ცვლილებების შეტანას მოითხოვს. როგორც საბჭოთა ხელისუფლების მიერ რეპრესიებულებთან შეხვედრის შემდეგ ფრაქციის წევრმა დიმიტრი ლორთქიფანიძემ აღნიშნა, გაზაფხულზე კანონში შეტანილი ცვლილებების მიხედვით, რეპრესირებულების კომპენსაციების გაცემის წესისა და ოდენობის განსაზღვრა სასამართლოს დაეკისრა, რაც ფრაქციისთვის და თავად რეპრესირებულებისთვის, კატეგორიულად მიუღებელია.
"კანონის ამოქმედებისთანავე შეიქმნა პრეცედენტი, რომ რეპრესირებულზე სასამართლო სამარცხვინო თანხას - 115 ლარიდან 500 ლარამდე გასცემს", - აღნიშნა მან.
ლორთქიფანიძის თქმით, რეგიონებში მცხოვრებ რეპრესირებულებს საბუთების შეგროვება და თბილისში ჩამოსვლა იმაზე მეტი უჯდებათ, ვიდრე კომპენსაციის ოდენობაა.
"ერთობა სამართლიანობისთვის" მომავალ კვირას რიგგარეშე პლენარულ სხდომაზე კანონში ცვლილების შეტანის ინიციტივით გამოვა, კერძოდ, მოითხოვს, კომპენსაციის ოდენობა იმპერატიულად, კანონით იყოს განსაზღვრული და არა სასამართლოს მიერ.
"ჩვენ ვნახეთ დსთ-ის ქვეყნების პრატქიკა, სადაც არ არსებობს პრეცენდენტი, რომ კომეპნასაციების ოდენობას სასამართლო ადგენდეს. აუცილებელია კანონში ჩაიწეროს კომპენსაციის ქვედა ზღვარიც", - მიაჩნია დეპუტატს.
დღევანდელ შეხვედრას ფრაქციის წევრების გარდა არასამთავრობო ორგანიზაციების - "ახალგაზრდა იურსტთა ასოციაციის", "ყოფილი პოლიტპატიმრები - ადამიანის უფლებებისთვის", "ადამიანის უფლებების პრიორტეტი" და "საბჭოთა კავშირის პერიოდის პოლიტიკური რეპრესიების მსხვერპლთა ხსოვნისა და თანადგომის საზოგადოება "მემორიალის" წევრებიც ესწრებოდნენ.
