დღეს, ბათუმის იუსტიციის სახლში გაიმართა კონფერენცია თემაზე „აღმშენებლობა თანამედროვე ტექნოლოგიებით". კონფერენციის ფარგლებში მოეწყო უახლესი მუდმივმოქმედი საბაზისო სადგურების ქსელის - „ჯეო-კორსის" პრეზენტაცია.
ღონისძიებას ესწრებოდნენ საჯარო რეესტრის თავმჯდომარე სოსო წიქარიშვილი, თავდაცვის სამინისტროს, სამოქალაქო ავიციის დეპარტამენტის, ტრანსპორტის, არქიტექტურისა და მშენებლობის დეპარტამენტის წარმომადგენლები, საერთაშორისო კომპანია „ლეიკას" სპეციალისტები, ექსპერტები და საამზომველო კომპანიების ხელმძღვანელები .
საჯარო რეესტრის ეროვნული სააგენტო განაგრძობს თანამედროვე ელექტრონული სისტემების დანერგვას და გაფართოებას ქვეყნის მასშტაბით. სწორედ ამ მიზნით, დაიგეგმა ქვეყნისთვის ერთ-ერთი მნიშვნელოვანი პროექტი საქართველოს მასშტაბით GPS სადგურების ანუ უწყვეტი, მუდმივმოქმედი საბაზისო სადგურების ქსელის (CORS) დაარსება.
CORS, ეს არის მაღალი სტანდარტი თანამგზავრის გამოყენებით, მაქსიმალური სიზუსტე მიწის კადასტრისთვის, ნავიგაციისთვის, სეისმური კვლევებისთვის, სოფლის მეურნეობისათვის, მშენებლობის დაგეგმარებისათვის. პროექტი მნიშვნელოვანია ქვეყნის ეკონომიკური განვითარებისათვის, სამოქალაქო მშენებლობისა და გეოდეზიური შესაძლებლობების მოდერნიზებისათვის.
GEO-CORS უკვე შეუერთდა ცენტრალური და აღმოსავლეთ ევროპის ქსელს EUPOS-ს, რაც თავისთავად უზრუნველყოფს ინფორმაციის მაღალ სიზუსტეს.
GEO-CORS-ის სისტემა შესაძლებელს ხდის მიწის აზომვას დაჩქარებული მეთოდითა და გაცილებით იაფი აღჭურვილობით, რაც, თავის მხრივ, ხელს შეუწყობს უძრავი ქონების ბაზარზე მოქმედი საამზომველო კომპანიების ბიზნესის წარმოების განვითარებას.
ქვეყნის მასშტაბით უკვე დამონტაჟდა 12 სადგური, აქედან 6 ა კლასის სადგური - მთელი საქართველოს ერთიან სივრცობრივ ბადეს ქმნის, ხოლო 6 ბ კლასის სადგური სრულად და უფრო მეტი სიზუსტით ფარავს დედაქალაქის ტერიტორიას.
GPS სადგურები იზოლირებული და დაცულია, აშენებულია მყარ გრუნტზე, აქვს დამოუკიდებელი კვების წყარო, სეისმური დაკვირვებისთვის ხელსაყრელი მდებარეობა და სხვ.
პროექტის შემდგომ ეტაპზე კიდევ 10 ბ კლასის სადგური დამონტაჟდება ქვეყნის ეკონომიკურად აქტიურ ზონებში.
სადგურების შექმნას და მისი ტექნიკით აღჭურვას ახორციელებს ტენდერში გამარჯვებული შვეიცარიული კომპანია „Leica", რომელიც მსოფლიო ლიდერია გეოდეზიური აპარატურის სფეროში.
CORS-ის სისტემის დანერგვა შვედეთის საერთაშორისო განვითარების თანამშრომლობის სააგენტოსა (Sida) და „მსოფლიო ბანკის(WB) - სოფლის მეურნეობის განვითრების პროექტის" დახმარებით განხორციელდა.