სახალხო დამცვლის აპარატი "საქართველოს სახალხო დამცველის შესახებ" კანონის მე-14-ე მუხლის საფუძველზე იწყებს მაესტროს ჟურნალისტების განცხადების შესწავლას.
" საქმის შესწავლის დასრულების შემდეგ დამატებით ეცნობება როგორც განმცხადებლებს ასევე საზოგადოებას",- განმარტა სახალხო დამცველის აპარატმა.
ტელეკომპანია "მაესტროს" ჟურნალისტები სახალხო დამცველისგან პროფესიული საქმიანობის განხორციელებაში ხელის შეშლის ფაქტებზე რეაგირებას ითხოვენ, ისინი აღნიშნავენ, რომ 2011 წლის 30 ნოემბერს მათ საქმიანობაში ხელი პოლიციელებმაც შეუშალეს.
"მოგეხსენებათ, რომ სისხლის სამართლის კოდექსის 154-ე მუხლი ითვალისწინებს ჟურნალისტის პროფესიულ საქმიანობაში უკანონოდ ხელის შეშლაზე პასუხისმგებლობას. 2011 წლის 30 ნოემბერს მედიის მიერ გავრცელებულ კადრებში კარგად ჩანს, რომ ტელეკომპანია "მაესტროს" ჟურნალისტებს შენობაში ყოველგვარი ახსნა-განმარტების გარეშე შესვლის საშუალებას არ აძლევს საპატრულო პოლიცია, რაც არის ჩვენი საქმიანობისთვის ხელის შეშლა,"- ნათქვამია სახალხო დამცველისადმი " მაესტროს" ჟურნალისტების მიმართვაში. ამასთან ჟურნალისტები კიდევ ერთხელ განმარტავენ, რომ ეროსი კიწმარიშვილის თანმხლები პირები თანამშრომლებს არ აძლევენ ტელეკომპანიის ეზოში გადაადგილების საშუალება. " ჩვენთვის ცნობილია თქვენი პოზიცია, რომ სახალხო დამცველი ვერ ჩაერევა ტელეკომპანიის შიდა საქმეებში, მაგრამ გაუგებარია დამოკიდებულება ჟურნალისტური საქმიანობის ხელის შეშლის ფაქტებზე, რომლის ამსახველი ვიდეომასალაც საზოგადოებამ არაერთხელ იხილა. მოგმართავთ თხოვნით, იხელმძღვანელოთ სისხლის სამართლის 154-ე მუხლით - ჟურნალისტის პროფესიულ საქმიანობაში უკანონოდ ხელის შეშლის თაობაზე და სახალხო დამცევლის შესახებ ორგანული კანონის მეცამეტე მუხლით, რომელიც თქვენს უშუალო ვალდებულებას წარმოადგენს და გავალდებულებთ მოახდინოთ რეაგირება პოლიციის თანამშრომელთა მხრიდან ჟურნალისტებისთვის პროფესიული საქმიანობის ხელშეშლაზე. ჩვენ ველით თქვენს გამოხმაურებას, რომ დაიცვათ ჩვენი კონსტიტუციური უფლება", - აღნიშნულია "მაესტროს" ჟურნალისტების განცხადებაში.
