ვფიქრობ, გუშინ ბიძინა ივანიშვილის ადვოკატების განცხადებაში ყველაზე ზუსტი ტერმინი იყო გამოყენებული – ავაზაკური რეკეტი. ზუსტად ავაზაკურ რეკეტთან გვაქვს საქმე, რასაც ვაკვირდებით ამდენი წლის განმავლობაში, მათ შორის ამ პროცესის გარშემო განვითარებულ მოვლენებთან დაკავშირებით, – ამის შესახებ საქართველოს პარლამენტის თავმჯდომარე შალვა პაპუაშვილმა „ქართული ოცნების“ საპატიო თავმჯდომარის, ბიძინა ივანიშვილის ლონდონის სასამართლოში მიმდინარე პროცესთან დაკავშირებით დასმული კითხვის პასუხად ჟურნალისტებს განუცხადა.
პაპუაშვილის თქმით, ხელის გულზე დევს სინამდვილეში, რომ ივანიშვილის მიმართ ხორციელდება ავაზაკური რეკეტი, რომლის მიზანიც არის ზეწოლა მასზე, რათა საკუთარი პოლიტიკური გავლენები გამოიყენოს ქვეყნის ინტერესების საწინააღმდეგოდ.
„ფაქტია, იმდენად გავლენებს ექვემდებარება სხვადასხვა ინსტიტუტი სხვადასხვა ქვეყანაში, რომ შეუძლიათ, პირდაპირ ხელით მართონ ესა თუ ის საკითხი, ვის ჰქონდეს დაშვება საკუთარ ანგარიშზე, ვისი ანგარიშიდან რა თანხა მოხსნან და ა.შ. ხელის გულზე დევს სინამდვილეში, რომ ეს არის ჩვეულებრივი ავაზაკური რეკეტი, რომლის მიზანიც არის ზეწოლა ბიძინა ივანიშვილზე, რათა მან საკუთარი პოლიტიკური გავლენები გამოიყენოს ჩვენი ქვეყნის ინტერესების საწინააღმდეგოდ და ამ მცდელობებს ჩვენ დიდი ხანია, ვაკვირდებოდით. ვაკვირდებოდით მათ შორის მაშინ, როდესაც ის პოლიტიკიდან დისტანცირებული იყო. გახსოვთ, აშშ-ის მაშინდელი ელჩი როგორ დაჟინებით ცდილობდა პოლიტიკაში არმყოფ ბიძინა ივანიშვილთან შეხვედრას და საბოლოო ჯამში, ესეც მიანიშნებს იმაზე, რა ძალები არიან ჩართული ამ პროცესზე გავლენის მოსახდენად“, – განაცხადა შალვა პაპუაშვილმა.
