აზერბაიჯანმა კიევში მის საელჩოზე თავდასხმის გამო რუსეთის ელჩს, მიხაილ ევდოკიმოვს საპროტესტო ნოტა გადასცა

პარასკევს, რუსეთის ელჩი მიხაილ ევდოკიმოვი აზერბაიჯანის საგარეო საქმეთა სამინისტროში დაიბარეს, კიევზე თავდასხმის დროს „ისკანდერის“ ერთ-ერთი რაკეტით (ან მისი ფრაგმენტებით) საელჩოს ტერიტორიაზე განხორციელებული დარტყმის გამო.

ელჩს აცნობეს, რომ აფეთქების შედეგად საელჩოს გარე კედლის ნაწილი მთლიანად დაინგრა, ასევე დაზიანდა ადმინისტრაციული შენობა, საკონსულო განყოფილება და ტერიტორიაზე არებული სამსახურებრივი მანქანები. არავინ დაღუპულა და დაშავებულა.

„მსგავსი სარაკეტო თავდასხმები, რომლებიც ეწინააღმდეგება საერთაშორისო სამართლის ნორმებსა და პრინციპებს, ადრეც მომხდარა.

კერძოდ, 2022 წლის 10 მარტს, ხარკოვში აზერბაიჯანის რესპუბლიკის საპატიო საკონსულოს შენობაზე საჰაერო დარტყმის შედეგად, ადმინისტრაციული შენობა სერიოზულად დაზიანდა, ხოლო სამსახურებრივი მანქანა გამოუსადეგარი გახდა“, - ნათქვამია განცხადებაში.

ასევე გაიხსენეს 2024 წლის 2 იანვარს კიევზე თავდასხმის შედეგები, როდესაც რუსული „კინჟალის“ აერობალისტურმა რაკეტამ, რომელიც არ აფეთქდა, საელჩოს გვერდით 3-მეტრისსიგანისკრატერი შექმნა, ხოლო რაკეტა რვა მეტრის სიღრმეზე მიწის ქვეშ იყო ჩაეშვა.

მიმდინარე წლის 28 აგვისტოს, კიდევ ერთი დარტყმა მოხდა საელჩოს ტერიტორიიდან 50 მეტრში, რამაც დააზიანა მისი შენობები და ელჩის რეზიდენცია.

ელჩს ასევე შეახსენეს მიმდინარე წლის აგვისტოში ოდესის რეგიონში აზერბაიჯანული კომპანია SOCAR-ის ობიექტებზე თავდასხმა, რის შედეგადაც ობიექტები დაზიანდა და მუშები დაშავდნენ.

აზერბაიჯანის საგარეო საქმეთა სამინისტრომ ასევე აღნიშნა, რომ ჯერ კიდევ 2022 წლის აპრილში მათ მოსკოვს გადასცეს უკრაინაში არსებული დიპლომატიური მისიების კოორდინატები და რუსულმა მხარემ პირობა დადო, რომ ამას გაითვალისწინებდა.

„აღვნიშნეთ, რომ ჩვენს დიპლომატიურ მისიებზე ასეთი თავდასხმები მიუღებელია და ვთხოვეთ რუსულ მხარეს, ჩაატაროს სათანადო გამოძიება ამ საკითხთან დაკავშირებით და წარმოადგინოს დეტალური ახსნა-განმარტება“, - აღნიშნულია აზერბაიჯანის საგარეო საქმეთა სამინისტროს განცხადებაში.

14 ნოემბერს, დაახლოებით ღამის 01:00 საათზე უკრაინის დედაქალაქ კიევზე სარაკეტო და დრონებით განხორციელებული თავდასხმების შედეგად „ისკანდერის“ ტიპის ერთ-ერთი რაკეტა აზერბაიჯანის საელჩოს ტერიტორიაზე დაეცა. 

აფეთქების შედეგად საელჩოს ტერიტორიის ღობის ნაწილი მთლიანად განადგურდა, დაზიანდა ნაგებობები, სამსახურებრივი მანქანები, საელჩოს ადმინისტრაციული შენობა და საკონსულო განყოფილება, ასევე სერიოზულად დაზიანდა დიპლომატიური მისიის ტერიტორია.