ქართულმა მხარემ კანადის ბაზარზე ქართული ღვინისა და ალკოჰოლური სასმელების ექსპორტის გაზრდის საკითხები შეათანხმა. სოფლის მეურნეობის სამინისტროს ინფორმაციით, მინისტრი ზაზა გოროზია 17-20 ნოემბერს, სამუშაო ვიზიტით კანადაში იმყოფებოდა, სადაც ონტარიოს და კვებეკის პროვინციების ალკოჰოლური სასმელების მაკონტროლებელი საბჭოების ხელმძღვანელებს შეხვდა. შეხვედრაზე კანადის ბაზარზე ქართული ღვინისა და ალკოჰოლური სასმელების ექსპორტის გაზრდის საკითხი განიხილეს.
ვიზიტის ფარგლებში, სოფლის მეურნეობის მინისტრი სასურსათო პროდუქციის და ღვინის ყოველწლიურ საერთაშორისო გამოფენას ,,Gourmet Food and wine export" დაესწრო, სადაც სოფლის მეურნეობის სამინისტროს ხელშეწყობით, ღვინისა და ალკოჰოლური სასმელების მწარმოებელი 11 ქართული კომპანია ,,კახური ტრადიციული მეღვინეობა", ,,თბილღვინო", ,,ქინძმარაულის მარანი", ,,ვაინმენი", ,,კორპორაცია ქინძმარაული", ,, ბაგრატიონი", ,,თელავის ღვინის მარანი", ,, თელიანი ველი", ,, წინანდლის ძველი მარანი", ,, ბესინი" და ,, აჭარის ღვინის სახლი" მონაწილეობდა.
,,Gourmet Food and wine export" ერთ-ერთი ყველაზე მასშტაბური გამოფენაა კანადის სურსათისა და ღვინის ინდუსტრიაში, სადაც მსოფლიოს ყველა კუთხიდან 1500 სახეობის ღვინო, ლუდი, სხვა ალკოჰოლური სასმელი და სასურსათო პროდუქციაა წარმოდგენილი. გამოფენაზე 38 000 სტუმარს შორის მსოფლიოს საუკეთესო ღვინის ექსპერტები, მწარმოებლები, საექსპორტო და სადისტრიბუციო კომპანიების წარმომადგენლები, ღვინის საცალო და საბითუმო მოვაჭრეები, რესტორნების და მაღაზიების მფლობელები იმყოფებოდნენ.
აღნიშნულ გამოფენაში ქართული კომპანიების მონაწილეობა ახალი საექსპორტო ბაზრების მოძიების, საერთაშორისო ბაზარზე ქართული პროდუქციის პოპულარიზაციის და ექსპორტის გაზრდის საშუალებას იძლევა, რაც ძალიან მნიშვნელოვანია ჩვენი ქვეყნისთვის.