ნავთობპროდუქტების იმპორტიორთა კავშირის ინფორმაციით, საქართველოს ფინანსთა სამინისტროს მონაცემების მიხედვით, 2011 წლის იანვარ-ოქტომბრის თვეებში საქართველოში იმპორტირებულ იქნა 620 ათასი ტონა ბენზინისა და დიზელის საწვავი, რაც 22 ათასი ტონით ნაკლებია გასული წლის ანალოგიური პერიოდის მაჩვენებელთან შედარებით - 642 ათასი ტონა.
კერძოდ, 2011 წლის პირველი 10 თვის განმავლობაში განხორციელდა 301 ათასი ტონა ბენზინისა (2010 წელს - 317 ათასი ტონა) და 318 ათასი ტონა დიზელის საწვავის (2010 წ - 324 ათასი ტონა) იმპორტი.
კავშირის ინფორმაციით, მიმდინარე წლის პირველი ათი თვის განმავლობაში საქართველოში იმპორტირებულ ბენზინში ყველაზე დიდი წილი უკავია რეგულარი A-92 ტიპის საწვავს - 73 პროცენტი, პრემიუმის ტიპის A -95 ტიპის საწვავს - 24 პროცენტი და სუპერი ტიპის A -98 ტიპის საწვავს - 3 პროცენტი.
რეგულარის ტიპის ბენზინის იმპორტი ხორციელდება როგორც აზერბაიჯანიდან, ასევე ევროპის ქვეყნებიდან (ბულგარეთი, რუმინეთი, საბერძნეთი...), რაც შეეხება სუპერი და პრემიუმი ტიპის ბენზინის საწვავის იმპორტს, ის მხოლოდ ევროპის ქვეყნებიდან ხორციელდება.
რაც შეეხება დიზელის საწვავს, იმპორტირებულ დიზელის საწვავში ყველაზე დიდი წილი უკავია L-62-ს - 70 პროცენტი, ხოლო დარჩენილი წილი უკავია ევრო დიზელს - 30 პროცენტი.
კავშირის ინფორმაციით, ბოლო პერიოდში ინტენსიურად მიმდინარეობს ბენზინზე მოძრავი ავტომობილების ავტოგაზზე გადაყვანა ამ უკანასკნელის შედარებით დაბალი ფასის გამო.