ხელოვნების ახალგაზრდა კრიტიკოსთა ასოციაციამ მუშაობა განაახლა. მსოფლიო თეატრისა და სათეატრო კრიტიკის შემსწავლელი ცენტრის ინიციატივით, შეიკრიბა საქართველოს სათეატრო კრიტიკოსთა ასოციაციის საინიციატივო ჯგუფი.
როგორც თეატრმცოდნემ, პროფესორმა, ხელოვნებათმცოდნეობის დოქტორმა ლევან ხეთაგურმა განაცხადა, ჯერ კიდევ 1989 წელს შეიქმნა ხელოვნების ახალგაზრდა კრიტიკოსთა ასოციაცია, რომლის პრეზიდენტიც თავად იყო და ამ ორგანიზაციაში 100-მდე საქართველოში მოქმედი კრიტიკოს-ხელოვნებათმცოდნე იყო გაერთიანებული.
"ასოციაციამ თავის დროზე მრავალი პროექტი განახორციელა. დღეს უცხოელი კოლეგები მის განახლებას ითხოვენ. გადავწყვიტეთ, განვაახლოთ ასოციაციის საქმიანობა. ეს იქნება საქართველოს სათეატრო კრიტიკოსთა ასოციაცია", - განაცხადა მან.
საინიციატივი ჯგუფის ინიციატივას გამოეხმაურა 20-მდე თეატრის კრიტიკოსი. პირველი შეკრების შემდეგ გადაწყდა, თავმჯდომარის მოვალეობის შესრულება დაევალოს თეატრმცოდნე თამარ მუქერიას, გენერალური მდივნობა ლაშა ჩხარტიშვილს, აღმასრულებელი მდივნობა სოფო ძიძიგურს. მათ უნდა მოამზადონ ორგანიზაციის შემდგომი საქმიანობის გეგმა.
ასოციაცია დაიწყებს ყოველთვიური ელექტროგზავნილისა და სათეატრო კრიტიკის ელექტრონული ჟურნალის მომზადებას, რომელსაც უხელმძღვანელებს თეატრმცოდნე, დოქტორანტი თამარ კიკნაველიძე.
ასოციაციის შექმნას მხარს უჭერს საქართველოს რეგიონალური თეატრების ქსელი.
