სიღნაღში, გზირიშვილის ქუჩაზე საცხოვრებელ სახლში გაჩენილ ხანძარს 70 წლის დოდო ბ-შვილის სიცოცხლე ემსხვერპლა.
როგორც შემთხვევის ერთადერთმა თვითმხილველმა, გარდაცვლილის რძალმა კახეთის საინფორმაციო ცენტრს განუცხადა, ის და მისი დედამთლი სახლში ერთად შევიდნენ, ნათურა აანთეს, რასაც ძლიერი აფეთქება და ცეცხლი მოჰყვა.
რძალ - დედამთილმა სახლიდან გამოსვლა მოასწრეს, თუმცა დოდო ბ-შვილი ნივთების გამოსატანად სახლში უკან შებრუნდა და გამოსვლა ვეღარ მოახერხა. ცეცხლის გაჩენის მიზეზად არასწორად გაყვანილ ბუნებრივი აირის სისტემას ასახელებენ.
„დავალიანების გამო გაზი ჩაჭრილი გვქონდა და დილას ხელოსანს ჩავართვევინეთ. მიზეზი ალბათ ეს იყო, რადგან გაზმა გაჟონა და აფეთქება ამან გამოიწვია",- ამბობს დაზარალებული მარიკა ბ-შვილი.
შემთხვევის ადგილზე მობილიზებული იყო კახეთის სამშველო სამსახური, გურჯაანის და სიღნაღის სახანძრო ბრიგადები. ხანძარი იმდენად ძლიერი იყო, რომ 70 წლის ქალბატონის გადარჩენა ვერ მოხერხდა.
მომხდარზე აღძრულია სისხლის სამართლის საქმე. გამოძიებას სიღნაღის პოლიცია აწარმოებს.
