კონფერენციის ფარგლებში თბილისის მერმა გიგი უგულავამ თბილისის მერიაში დანერგილ ინფორმაციულ ტექნოლოგიებსა და ელექტრონულ მომსახურეობაზე ისაუბრა. ქალაქის თვითმმართველობის ორგანოებში განხორციელებული სიახლეები თბილისელებს შესაძლებლობას აძლევს, სახლიდან გაუსვლელად, უმოკლეს ვადაში მიიღონ როგორც ინფორმაცია მერიაში განხორციელებულ სიახლეებზე, ისე სხვადასხვა სახის მომსახურება.

საჯარო სამართლის იურიდიული პირის - მონაცემთა გაცვლის სააგენტოს და ICT ბიზნეს საბჭოს ორგანიზებით და თბილისის მერიის, საქართველოს იუსტიციის სამინისტროს, NATO-საქართველოს პროფესიული განვითარების პროგრამისა და ამერიკის შეერთებული შტატების სავაჭრო პალატის მხარდაჭერით, საქართველოში რიგით IV ყოველწლიური რეგიონული კონფერენცია გაიმართა, რომლის მთავარი თემა: კიბერუსაფრთხოებასთან დაკავშირებული საკითხები და ინფორმაციული ტექნოლოგიების განვითარების მიმართულებები იყო. კონფერენციის მუშაობაში მსოფლიოს 30-ზე მეტი ქვეყნის 400-მდე წარმომადგენელი მონაწილეობდა.

შეხვედრაზე კიბერუსაფრთხოებისა და ინფორმაციული ტექნოლოგიების განვითარების საკითხებს, წლის განმავლობაში შემუშავებული ინოვაციური IT პროექტებსა და სხვადასხვა ქვეყანაში მიღწეულ წარმატებებს განიხილავდნენ.

კიბერუსაფრთხოებისა და ინფორმაციული ტექნოლიგიების განვითარების IV რეგიონულ კონფერენციაზე საქართველოს მხრიდან ყურადღება დაეთმო ელექტრონული ID ბარათებისა (eID) და Smart City-ის პროექტებს. Smart City-ის პროექტები ურბანული განვითარების პრინციპების ინფორმაციულ და საკომუნიკაციო ტექნოლოგიებს ეფუძნება.

აღნიშნულ თემაზე კონფერენციის მონაწილეებს თბილისის მერმა სიტყვით მიმართა.

"მერიაში უკვე სამი წელია მოქმედებს სპეციალური პროგრამა, რომელიც ადგილობრივი ხელისუფლების ყველა რგოლში ელექტრონულ დოკუმენტბრუნვას უზრუნველყოფს, რაც მოქალაქეების მომსახურებას ამარტივებს და მინიმუმამდე ამცირებს ბიუროკრატიულ ვადებს. ასევე რამდენიმე წელია არსებობს თბილისის მერიის ოფიციალური ვებგვერდი: Tbilisi.gov.ge, სადაც ნებისმიერ მსურველს შესაძლებლობა აქვს გაეცნოს მერიის მიერ განხორციელებულ პროექტებსა და ყოველდღიურ სიახლეებს. ელექტრონული მომსახურების კუთხით მნიშვნელოვანი სიახლეებია თბილისის არქიტექტურის სამსახურსა და ქონების მართვის სააგენტოში. არქიტექტურის სამსახურში დაინერგა განაცხადების ელექტრონულად მიღების შესაძლებლობა. მომხმარებელს შესაძლებლობა აქვს ინტერნეტის საშუალებით გააკეთოს შემდეგი სახის განაცხადები: მიწის ნაკვეთის სამშენებლოდ გამოყენების პირობებისა და კორპუსის წითელი ხაზების დადგენა, ქალაქმშენებლობითი პარამეტრების განსაზღვრა, ესკიზური პროექტის წინასწარი განხილვა, მიწის ნაკვეთის გამიჯვნის ესკიზური პროექტისა და მიწის ნაკვეთის საზღვრების გეგმის დამოწმებული ასლის აღება და მცირე მშენებლობაზე ნებართვის საჭიროების განსაზღვრა. ინფორმაციული ტექნოლოგიების განვითრების კუთხით მნიშვნელოვანი სიახლეებია თბილისის მერიის ქონების მართვის სააგენტოშიც. დღეს უკვე სახლიდან გაუსვლელად, ნებისმიერ დაინტერესებულ პირს შეუძლია სააგენტოს საქმიანობასთან დაკავშირებული თითოეული ოპერაცია ონლაინრეჟიმში განახორციელოს. მოქალაქეს აღარ უწევს მერიაში რამდენიმეჯერ მისვლა და სხვადასხვა პროცედურის გავლა. ქონების მართვის სააგენტო დაინტერესებულ პირებს სხვადასხვა ელექტრონულ მომსახურებას სთავაზობს. ესენია: ელექტრონული განაცხადების მიღება, მიწის ნაკვეთის მონიშნვა და ონლაი აუქციონი. ვებგვერდის საძიებო სისტემის მეშვეობით მომხმარებელს შეუძლია იპოვოს მისთვის სასურველი ობიექტი, აირჩიოს ქონება რაიონის, ფასის და ფართობის მიხედვით. განაცხადის გამოგზავნიდან საკუთრების მოწმობის მიღების ჩათვლით ყველა ეტაპი ტარდება ელექტრონულად. აღნიშნული პროცედურების გამარტივებით და მომსახურების გაუმჯობესებით ნებისმიერ თბილისელს შესაძლებლობა აქვს სახლიდან გაუსვლელად, უმოკლეს ვადაში მიიღოს, როგორც მისთვის სასურველი ინფორმაცია, ისე ნებისმიერი ზემოთ აღნიშნული მომსახურება.

გიგი უგულავას განცხადებით, ეს არის ფუნდამენტური განსხვავება, იმიტომ რომ 99 % შემთხვევაში, ნებისმიერ ბიურიკრატს თავის მოვალეობად მიაჩნდა, ადამიანისთვის ეთქვა, როგორ არ გამოვა ესა თუ ის საკითხი, რადგან მისი გადაჭრა გამორიცხულია კანონითაც და თეორიულადაც. დღევანდელი ბიურიკრატიის მიზანი კი არის შეიცვალოს შეგნება და ადამიანს გაუწიოს სერვისი.

"როდესაც მიდიხარ თანამედროვე კარგად ჩამოყალიბებულ დაწესებულებაში, დღეს იქ ადამიანი გიხსნის, თუ როგორ უნდა გაკეთდეს საქმე. იმიტომ, რომ ის დაინტერესებულია ამ საქმის წარმატებით გამოსვლაში. როდესაც ვლაპარაკობთ ცვლილებებზე და იმაზე, თუ რა შეიცვალა სახელმწიფო წარმოებაში და სახელმწიფოს დამოკიდებულებაში მოქალაქეების მიმართ ვარდების რევოლუციის შემდეგ, პირველ რიგში სწორედ აღსანიშნავია ის, რომ ეტაპობრივად ხდება ბიუროკრატის შეცვალა, რაც ყველაზე რთულად შესაცვლელია მსოფლიოს ყველა ქვეყანაში. საქართველოში შეიცვალა დამოკიდებულება და ეს ვერ მოხერხდება მარტო ჩამოთვლილი ღონისძიებებით. პრინციპულია სისტემური ცვლილებები და თანამედროვე ახალი ტექნოლოგიების დანერგვა", - განაცხადა მან.