საქართველოს იუსტიციის სამინისტროს სამოქალაქო რეესტრის თბილისის არქივიდან საქართველოს ეროვნულ არქივს გადაეცა თბილისის საეკლესიო მეტრიკული წიგნები, კერძოდ, ევანგელისტურ-ლუთერანული ეკლესიის, სინაგოგის, მეჩეთის ჩანაწერები, რომელიც 1865-1928 წლებს განეკუთვნება.
საარქივო მასალებს შორის არის, ასევე, 1926-1935 წლებში სასამართლო წესით აღდგენილი დაბადების აქტები, რომელიც 6 წიგნშია გაერთიანებული და 1877-1920 წელს დაბადებულ მოქალაქეებს შეეხება. აქვეა თბილისში, მალაკნების დასახლებაში 1914 წელს დაბადებული დუხობორების შესახებ ჩანაწერებიც.
მეტრიკული ჩანაწერები საარქივო წესით დამუშავდა და საქართველო-იმერეთის სინოდალური კანტორის ფონდის ნაწილი გახდა. ახალ საარქივო დოკუმენტებზე დაყრდნობით დაინტერესებულ პირებზე ცნობების გაცემა უკვე დაიწყო.
ცნობისათვის: სამოქალაქო აქტების რეგისტრაციის ორგანოების შექმნამდე, გასულ საუკუნეებში დაბადების, ქორწინებისა და გარდაცვალების ფაქტები შესაბამის რაიონში მოქმედ ეკლესიაში, სინაგოგასა თუ მეჩეთში რეგისტრირდებოდა.
