ლაგოდეხის რაიონის სოფელ თელაში მეწყერის შედეგად ჩვენს წელთაღრიცხვამდე I და II მეორე საუკუნეების უნიკალური ნივთები აღმოჩნდა. ადგილობრივმა მაცხოვრებლებმა ელინისტური შავპრიალა თიხის ჭურჭელი, დოქები, ბრინჯაოს სამაჯურები და კალმის სამკაულები იპოვეს, რომლებიც ოქროს მტვრით არის დაფარული.
სპეციალისტების თქმით, ასეთი აღმოჩენა ლაგოდეხის ტერიტორიაზე ამ დრომდე არ ყოფილა.
როგორც კახეთის საინფორმაციო ცენტრს სოფელ თელას მაცხოვრებლებმა განუცხადეს, მდინარე ბაისუბნის წყლის ადიდების დროს უძველეს ნივთებს ხშირად პოულობენ. ისინი სოფელში სპეციალისტების ჩასვლას და ტერიტორიის შესწავლას ითხოვენ.
„მე, ჯერ კიდევ ჩემი ბავშობიდან მახსოვს, რომ ამ მდინარის კალაპოტში იყო ძალიან ბევრი ქვევრის ტიპის და ქვაყუთოვანი სამარხები. ასეთი ნივთების პოვნის შემთხვევები ხშირი იყო. ქვევრებში იყო სამკაულები, რომლებსაც ზოგიერთმა ადამიანმა რესტავრაციაც კი გაუკეთა და ახლაც კი ხმარობს. მსგავსი ნივთები ბევრ ოჯახში ინახება", - განაცხადა სოფელ თელას საჯარო სკოლის დირექტორმა ლამარა ტაბატაძემ.
ლაგოდეხის გამგეობის განათლებისა და კულტურის სამსახურის უფროსის აკაკი მჭედლიშვილის განცხადებით, ამ ტერიტორიაზე პირველად აღმოჩნდა მოჭიქული ბრინჯაოს სამაჯურები. „აქ არის ბრინჯაოს სამაჯურები, რომელიც არის მოჭიქული ბრინჯაო. ეს ძალიან საინტერესოა, რადგან ამ ტერიტორიაზე პირველად აღმოვაჩინეთ. სამწუხაროა, რომ თვითონ სოფელი თელა არ არის შესწავლილი. თუ დაიმეწყრა ტერიტორია, მაშინვე სოფლის სკოლის მოსწავლეები და პედაგოგები გვატყობინებენ. ჩვენ ჩამოვდივართ და ვნახულობთ, რამდენად ფასეულია ნივთები", - აღნიშნა აკაკი მჭედლიშვილმა.