წლის ბოლომდე კომპანია "GIG TAXI"-ი საკუთარი ტაქსოპარკისა და შესაბამისად ბაზრის წილის ზრდას გეგმავს. როგორც სააგენტო "ჯი-ეიჩ-ენთან" საუბრისას "GIG TAXI" -ის მმართველმა დირექტორმა კოტე თოფურიამ განაცხადა, ამ დროისთვის კლიენტებს "GIG TAXI"-ის 200-მდე ტაქსი ემსახურება, თუმცა წლის ბოლომდე ტაქსოპარკი კიდევ 150 ავტომობილით შეივსება.
როგორც თოფურია განმარტავს, ახალი ტაქტების შემოყვანა არ მომხდარა, რადგანაც პროექტის დაწყების პერიოდში, 2007-2008 წლებში, 400-მდე "პეჟოს" მარკის კომფორტული ავტომობილის შეძენა მოხდა და აღნიშნული მანქანები ქსელში ეტაპობრივად გადიოდნენ, რაც არსებულ მოთხოვნაზე იყო დამოკიდებული. აღნიშნული პროექტის განხორციელებისთვის ინვესტორმა 5 მლნ. დოლარის ინვესტირება უკვე მოახდინა.
თოფურია განმარტავს, რომ ბიზნესის გაფართოება კარგი საშუალებაა დასაქმებისთვის და ამ მიზნით კომპანია გამოცდილ მძღოლებს უკვე ეძებს.
"GIG TAXI"-ი საწვავად, ძირითადად, აირს იყენებს, რაც მენეჯმენტს საშუალებას აძლევს, ხარჯი 50 %-ით შეამციროს. კომპანიის ხელმძღვანელის განმარტებით, სწორედ ამ გზით კომპანია ახერხებს, ბაზარზე მომსახურეობის ტარიფიც შედარებით დაბალი ტარიფით შეინარჩუნოს. ტაქსოპარკს აქვს საერთაშორისო სტანდარტების შესაბამისი სერვისცენტრი, სადაც ტაქსები გადიან სავალდებული ტექნიკურ დათვალიერებას, ეს კი უზრუნველყოფს მგზავრის უსაფრთხო გადაადგილებას.
თოფურიას განმარტებით, ამ დროისთვის "GIG TAXI"-ი ლეგალური ბაზრის 60 %-ს აკონტროლებს.
"GIG TAXI"-ი, კერძო კლიენტების გარდა, კორპორატიულ კლიენტებსაც ემსახურება. როგორც "GIG TAXI"-ის მმართველი დირექტორი აცხადებს, ამ ეტაპზე კომპანია 200-მდე კორპორატიულ კლიენტს ემსახურება. კერძო პირებისთვის მომსახურების ტარიფი 1 კმ-ზე საშუალოდ 50 თეთრია, ხოლო კორპორატიული კლიენტები შედარებით შეღავათიანი ტარიფებით სარგებლობენ.
თოფურიას განმარტებით, ყოველთვიურად "GIG TAXI" -ის დაკვეთები 7-8 %-ით იზრდება.
გამართული მუშაობისთვის, "GIG TAXI"-მა ქოლცენტრის გადაიარაღებაც მოახდინა, რაც კომპანიას საშუალებას აძლევს, კლიენტურას უფრო კომფორტულად მოემსახუროს.
ამ დროისთვის "GIG TAXI"-ი მხოლოდ თბილისშია წარმოდგენილი, თუმცა მას შემდეგ, რაც კომპანია ბაზარზე წილს გაზრდის, რეგიონებში სერვისცენტრების გახსნაზედაც იმსჯელებს.
"GIG TAXI"-ს აქვს ექსკლუზიური უფლება თბილისის საერთაშორისო აეროპორტთან, რომლის მიხედვითაც, მგზავრებისა და თავად კომპანია "ტავის" გადაადგილებაზე უშუალოდ "GIG TAXI"-ი ზრუნავს.
კომპანიაში აცხადებენ, რომ კომპანია კლიენტებს მოსახერხებელ გადაადგილებას სთავაზობს თბილისის საერთაშორისო აეროპორტსა და საქართველოს ნებისმიერ რეგიონს შორის. მგზავრებს საშუალება აქვთ, წინასწარ შეუკვეთონ აეროპორტში დახვედრა (ჩამოსვლის, გამგზავრებისას).
შეგახსენებთ, რომ კომპანია "GIG TAXI"-ი არის ტაქსებით მომსახურების წამყვანი კომპანიის, "ქართული საინვესტიციო ჯგუფი XXI"-ს ნაწილი. "GIG TAXI"-ი ქართულ ბაზარზე გამოჩნდა 2007 წელს, როდესაც განახორციელა მნიშვნელოვანი ინვესტიცია ტაქსებით მომსახურების სექტორში. კომპანიამ თბილისში მოღვაწეობა 2007 წლის სექტემბერში 100 ავტომანქანით დაიწყო. მოგვიანებით კომპანიამ შემოიყვანა დაახლოებით 330 მანქანა საქართველოში. 2009 წლის მარტში "GIG TAXI"-ს მიენიჭა "ხარისხის ნიშანი".