ევრობანკის ინფორმაციით, კერძო ინვესტიციების განახლება ძირითადი პრიორიტეტია. EBRD-ის ინფორმაციით, საქართველოში 2012 წლისთვის პირდაპირი უცხოური ინვესტიციების სტიმულირებაზე ორიენტირებული ხელისუფლების მცდელობები უნდა გაფართოვდეს და ადგილობრივად შეეწყოს ხელი დანაზოგის გაკეთებასა და ინვესტიციებს. ფინანსური სექტორის პოლიტიკა აქცენტირებული უნდა იყოს ინფლაციის ორიენტირებაზე გადასვლის პროცესის დასრულებაზე და უფრო მეტად უნდა გაძლიერდეს გონივრული საბანკო ზედამხედველობა, ბანკის ინფორმაციითვე მომავალ წელს მუნიციპალური და სხვა ინფრასტრუქტურა უნდა გაძლიერდეს.
"მთავარი გამოწვევა გულისხმობს ფიზიკური ინფრასტრუქტურის რეაბილიტაციას და მუნიციპალური საწარმოების რესტრუქტურიზაციას - ეფექტურობის გაზრდის მიზნით. ბუნებრივი რესურსების კუთხით დომინანტური სახელმწიფოს მფლობელობაში არსებული პირის როლი უნდა შემცირდეს საქართველოს გაზისა და ნავთობის კორპორაციაში. უნდა მოხდეს ამ კომპანიის დაყოფა ან ფრაგმენტული ნაწილების გაყიდვა კონკურენციის გაზრდის მიზნით"- ნათქვამია EBRD-ის მოხსენებაში.
მათივე ინფორმაციით, საქართველოს ხელისუფლებამ უნდა გააუმჯობესოს სავაჭრო და საინვესტიციო კლიმატი. მოლაპარაკებები უნდა გაიმართოს ევროპის ბაზრებზე შესვლის მიზნით. ამით მოხდება სოფლის მეურნეობის დარგის აღორძინების ხელშეწყობა და სარეალიზაციო საქონლის წარმოების სტიმულირება პირდაპირი უცხოური ინვესტიციებით.
