"ცენტრ-პოინტის" მიერ დაზარალებული ადამიანები პარლამენტის დროებითი კომისიის შექმნას ითხოვენ. დღეს "ცენტრ-პოინტის" მიერ დაზარალებული ადამიანები პარლამენტში ოპოზიციური ფრაქცია ~ერთობა სამართლიანობისთვის~ წევრებს შეხვდნენ და საკუთარ პრობლემებზე ესაუბრნენ.
"ცენტრ-პოინტის" მიერ დაზარალებულები ამბობენ, რომ მათ "ცენტრ-პოინტ" ჯგუფის დირექტორისაგან ხელმოწერილი შეტყობინება მიიღეს, სადაც აღნიშნულია, რომ თუ 7 დღის განმავლობაში ახალ ხელშეკრულებას ხელს არ მოაწერენ, მაშინ მათთან ძველი ხელშეკრულება შეწყდება.
ამასთან, დაზარალებულები აცხადებენ, რომ მათ დამატების სახით უნდა გადაიხადონ კვადრატულ მეტრზე 100 დოლარი პლიუს დღგ გადახდილი თანხის 18%.
ჟურნალისტებთან საუბარში დაზარალებული სვეტა მურადიანი აცხადებს, რომ მათი ბინა სააკაძის მოედანზე, მერიის ეზოშია, ყველა ვალდებულება შესრულებული აქვს, თანხა ჯერ კიდევ 2006 წელს დაფარული აქვს, მაგრამ იმის ნაცვლად, რომ ბინა 2007 წელს დამთავრებული სახით ჩაებარებინათ, ახალი ხელშეკრულების გაფორმებას და კვადრატულზე 100 დოლარის გადახდას სთხოვენ.
"4 წელია ველოდებით, რომ დამთავრებული ბინა ჩაებარებინათ, მაგრამ ახლა გვეუბნებიან, რომ თუ ახალ ხელშეკრულებას არ გავაფორმებთ, ბინას ვერ მიიღებთ და მას გაყიდიან. სასამართლოს მივმართეთ და სარჩელიც შევიტანეთ, რადგან ჩვენს მიმართ ძალიან დიდ უკანონობას აქვს ადგილი", - განაცხადა სვეტა მურადიანმა. მისივე თქმით, რამდენჯერმე მიმართეს თბილისის მერიას და ვიცე-სპიკერს რუსუდან კერვალიშვილს, მაგრამ მას ეს საკითხი არ აინტერესებს.