გალაკტიონ ტაბიძე 1891 წლის 17 ნოემბერს სოფელ ჭყვიშში დაიბადა. 1914 წელს გამოვიდა გალაკტიონ ტაბიძის ლექსების პირველი კრებული, ხოლო 1919 წელს გამოცემულმა "არტისტულმა ყვავილებმა" ავტორს "გენიალური გალაკტიონისა" და "პოეტების მეფის" სახელი მოუტანა. 1922-1923 წლებში გამოსცემდა "გალაკტიონ ტაბიძის ჟურნალს". 1924 წელს იგი იყო ჟურნალ "მნათობის" ერთ-ერთი ფუძემდებელი. გალაკტიონ ტაბიძე ლექსების და პოემების თარგმანები სისტემატურად ქვეყნდებოდა ფრანგულ, გერმანულ და ინგლისურ ენებზე. 1991 წელს გალაკტიონის ერთტომეული ბერლინში, გერმანულ ენაზე გამოიცა.

უდიდესი პოპულარობისა და თაყვანისცემის მიუხედავად, პოეტმა სიცოცხლე სულიერ სიმარტოვეში განვლო. "პოეტების მეფემ" სიცოცხლე თვითმკვლელობით დაასრულა. გალაკტიონი 1959 წლის 17 მარტს გარდაიცვალა.

თეატრების ხელოვნურად გაზრდილი თანხების გამო მწერალთა კავშირი გალაკტიონის იუბილეს ვერსად აღნიშნავს", - განაცხადა "ჯი-ეიჩ-ენთან" მწერალთა კავშირის წევრმა რეზო მიშველაძემ.

"რომელ თეატრში გავმართავთ, არ ვიცით. თანამედროვე მზარდი ეკონომიკის პირობებში, მწერალთა კავშირს საკუთარი ხარჯებით არ შეუძლია თეატრების ხელოვნურად გაზრდილი თანხების დაფარვა. აქედან გამომდინარე, ვდგავართ პრობლემის წინაშე. საუკუნის პოეტის იუბილე გვინდა მასშტაბური ღონისძიებით აღვნიშნოთ. სამწუხაროდ, კულტურის სამინისტროც ფეხს ითრევს, დაავალოს რომელიმე თეატრს გალაკტიონის 120 წლის იუბილეს მოწყობა", - აღნიშნა მიშველაძემ.